ശാന്തസ്വരൂപനായ ശാസ്താവ്: തെന്നൂർ ശ്രീകണ്ഠൻ ശാസ്താ ക്ഷേത്രത്തിലെ പ്രതിഷ്ഠാ വിശേഷങ്ങൾ

ഈ രൂപത്തിലുള്ള പ്രതിഷ്ഠ കുടുംബഭദ്രതയ്ക്കും സമാധാനത്തിനും അത്യുത്തമമാണെന്ന് വിശ്വസിക്കപ്പെടുന്നു. നൂറ്റാണ്ടുകൾ പഴക്കമുള്ളതും കാലപ്പഴക്കത്താൽ ജീർണ്ണാവസ്ഥയിലായിരുന്നതുമായ ഈ ക്ഷേത്രം അടുത്ത കാലത്തായി കേരളീയ വാസ്തുശാസ്ത്ര പ്രകാരം ഭക്തജനങ്ങളുടെയും ക്ഷേത്ര ട്രസ്റ്റിൻ്റെയും സഹകരണത്തോടെ പൂർണ്ണമായും പുനർനിർമ്മിച്ചു.

പ്രധാന പ്രതിഷ്ഠയ്ക്ക് പുറമെ മാടൻ തമ്പുരാൻ, ഭുവനേശ്വരി, ശ്രീകൃഷ്ണൻ, യക്ഷിയമ്മ എന്നീ ഉപദേവതകൾക്കും ഇവിടെ പ്രത്യേക ശ്രീകോവിലുകൾ ഒരുക്കിയിട്ടുണ്ട്. ശനിദോഷ നിവാരണത്തിനായി ദൂരദേശങ്ങളിൽ നിന്ന് പോലും ധാരാളം ഭക്തർ എത്തുന്ന ഈ ക്ഷേത്രത്തിൽ ശനിയാഴ്ചകളിലെ ദർശനത്തിന് വലിയ പ്രാധാന്യമുണ്ട്.

advertisement

ശാസ്താവിനു മുന്നിൽ നാളികേരം ഉടച്ച് എള്ളെണ്ണയും എള്ളുകിഴിയും ഉപയോഗിച്ച് നടത്തുന്ന നീരാഞ്ജന വഴിപാട് ഇവിടുത്തെ പ്രധാന ചടങ്ങാണ്. ശനിദശ, ഏഴരശനി, കണ്ടകശനി, അഷ്ടമശനി തുടങ്ങിയ ദോഷങ്ങൾ അകറ്റി ജീവിതത്തിൽ ഐശ്വര്യം കൈവരിക്കാൻ ഈ വഴിപാട് ഉത്തമമാണെന്ന് കരുതപ്പെടുന്നു. രോഗനാശകനായ വൈദ്യനായും ശാസ്താവിനെ ഇവിടെ ആരാധിക്കുന്നതിനാൽ കർക്കിടക മാസത്തിലെ ഔഷധസേവയ്ക്കും വലിയ പ്രാധാന്യമുണ്ട്. മിഥുന മാസത്തിലെ പ്രതിഷ്ഠാ വാർഷികവും നാല് ദിവസം നീണ്ടുനിൽക്കുന്ന മകരവിളക്ക് മഹോത്സവവുമാണ് ക്ഷേത്രത്തിലെ പ്രധാന ആഘോഷങ്ങൾ.