ജീവനക്കാരുടെ മിന്നല്‍ പണിമുടക്ക്; പത്മനാഭപുരം കൊട്ടാരത്തിലെത്തിയ വിനോദ സഞ്ചാരികള്‍ നിരാശരായി

തിരുവിതാംകൂര്‍ ചരിത്രത്തിലെ സുപ്രധാന സ്ഥലമായ കന്യാകുമാരി പത്മനാഭപുരം കൊട്ടാരത്തില്‍ ജീവനക്കാരുടെ മിന്നല്‍ പണിമുടക്ക്. കന്യാകുമാരി ജില്ലയിൽ കേരള സർക്കാരിന്റെ നിയന്ത്രണത്തിലുള്ള പത്മനാഭപുരം കൊട്ടാരത്തിൽ ജോലി ചെയ്യുന്ന കരാർ ജീവനക്കാർക്ക്  6 മാസമായി ശമ്പളം ലഭിച്ചിരുന്നില്ല. ഇതില്‍ പ്രതിഷേധിച്ചാണ് ജീവനക്കാർ  മിന്നൽ പണിമുടക്ക് നടത്തിയത്. പണിമുടക്കിനെ തുടര്‍ന്ന് കൊട്ടാരം സന്ദർശിക്കാൻ എത്തിയ വിനോദ സഞ്ചാരികൾ നിരാശരായി മടങ്ങി.

advertisement

കന്യാകുമാരി ജില്ലയിലെ തക്കലയ്ക്കടുത്തുള്ള പദ്മനാഭപുരത്താണ് പുരാതനമായ തിരുവിതാംകൂർ രാജകൊട്ടാരം സ്ഥിതി ചെയ്യുന്നത്. കേരള വാസ്തുവിദ്യ ശൈലിയുടെ മികച്ച ഉദാഹരണമായ കൊട്ടാരം സന്ദർശിക്കാൻ ദിവസവും ആയിരക്കണക്കിന് വിനോദസഞ്ചാരികളാണ് എത്തുന്നത്.

കൊട്ടാരം നടത്തിപ്പിനായി കേരള സർക്കാർ നിരവധി ജീവനക്കാരെയും കരാർ ജീവനക്കാരെയും ഇവിടെ നിയമിച്ചിട്ടുണ്ട്. ഇവിടെ ജോലി ചെയ്യുന്ന കരാർ ജീവനക്കാർക്ക് 6 മാസമായി സർക്കാർ ശമ്പളം നൽകിയിട്ടില്ല. ഇതിനെതുടർന്നാണ്  25 ഓളം വരുന്ന കരാര്‍ ജീവനക്കാര്‍ കൊട്ടാരത്തിന്റെ കവാടത്തിൽ ഉപരോധ സമരം നടത്തിയത്.