ഒറാക്കിളിൽ കൂട്ട പിരിച്ചുവിടൽ: ഇന്ത്യയിൽ ജോലി നഷ്ടമായത് 12,000 പേർക്ക്

ഇന്ത്യയിൽ ഒറാക്കിളിന് ഏകദേശം 30,000 ജീവനക്കാരാണുള്ളത്. ഇതിൽ 12,000 പേരെ ഇതിനകം പിരിച്ചുവിട്ടതായാണ് മണികൺട്രോൾ റിപ്പോർട്ട് ചെയ്യുന്നത്. പ്രവർത്തനക്ഷമത വർദ്ധിപ്പിക്കുന്നതിന്റെ ഭാഗമായുള്ള സംഘടനാപരമായ മാറ്റങ്ങളാണ് ഇതിന് കാരണമായി കമ്പനി ചൂണ്ടിക്കാണിക്കുന്നത്. ആഗോളതലത്തിൽ ഏകദേശം 30,000 തൊഴിലവസരങ്ങളാണ് ഒറാക്കിൾ വെട്ടിക്കുറയ്ക്കുന്നത്.

"ഇന്ന് നിങ്ങളുടെ അവസാന പ്രവൃത്തി ദിവസമാണ്" എന്ന ചുരുങ്ങിയ അറിയിപ്പോടെയാണ് പലർക്കും പിരിച്ചുവിടൽ കത്തുകൾ ലഭിച്ചത്. ഇമെയിൽ ലഭിച്ചാലുടൻ തന്നെ കമ്പനി സിസ്റ്റങ്ങളിലേക്കും ലാപ്ടോപ്പുകളിലേക്കും ഫയലുകളിലേക്കുമുള്ള ആക്സസ് റദ്ദാക്കുമെന്നും അറിയിപ്പിലുണ്ട്. വ്യക്തിഗത വിവരങ്ങളും രേഖകളും കൈമാറാൻ ജീവനക്കാരോട് സ്വകാര്യ ഇമെയിൽ വിലാസങ്ങൾ നൽകാൻ കമ്പനി ആവശ്യപ്പെട്ടു.

advertisement

ആനുകൂല്യങ്ങളും നിബന്ധനകളും

• പിരിച്ചുവിടപ്പെടുന്നവർക്കായി കമ്പനി ഒരു പ്രത്യേക പാക്കേജ് പ്രഖ്യാപിച്ചിട്ടുണ്ട്:
• സേവനം അനുഷ്ഠിച്ച ഓരോ വർഷത്തിനും 15 ദിവസത്തെ ശമ്പളം.
• ഒരു മാസത്തെ നോട്ടീസ് പേ, ലീവ് എൻക്യാഷ്‌മെന്റ്, ഗ്രാറ്റുവിറ്റി.
• കൂടാതെ രണ്ട് മാസത്തെ ശമ്പളം ടോപ്പ്-അപ്പായി നൽകാനും നിർദ്ദേശമുണ്ട്.
• കമ്പനിയുമായി സൗഹാർദ്ദപരമായ രീതിയിൽ പിരിഞ്ഞുപോകാൻ തയ്യാറാകുന്നവർക്ക് മാത്രമേ ഈ ആനുകൂല്യങ്ങൾ ലഭിക്കൂ എന്ന നിബന്ധനയും നിലവിലുണ്ട്.

എന്തുകൊണ്ട് ഈ പിരിച്ചുവിടൽ?

ആർട്ടിഫിഷ്യൽ ഇന്റലിജൻസ് (AI), ഡാറ്റാ സെന്റർ ഇൻഫ്രാസ്ട്രക്ചർ തുടങ്ങിയ മേഖലകളിൽ കൂടുതൽ നിക്ഷേപം നടത്തുന്നതിനായി കമ്പനി തങ്ങളുടെ മുൻഗണനകൾ മാറ്റുകയാണ്. ഓപ്പൺഎഐയുമായുള്ള വൻകിട കരാറുകൾക്ക് പിന്നാലെ കമ്പനിയുടെ മൂലധന ചെലവ് വർദ്ധിച്ചിട്ടുണ്ട്. ഇതിനിടയിലാണ് പഴയ ബിസിനസ് മോഡലുകളിലെ ജീവനക്കാരെ ഒഴിവാക്കി പുനഃസംഘടന നടത്തുന്നത്.

മെറ്റ, ആമസോൺ തുടങ്ങിയ വൻകിട കമ്പനികൾക്ക് പിന്നാലെ ഒറാക്കിളും പിരിച്ചുവിടൽ പ്രഖ്യാപിച്ചത് ഐടി മേഖലയിൽ വലിയ ആശങ്കയ്ക്ക് കാരണമായിട്ടുണ്ട്. ജോലിഭാരത്തെക്കുറിച്ചും തൊഴിൽ നിയമങ്ങളെക്കുറിച്ചും പരാതിപ്പെട്ടവരെ നേരത്തെ തന്നെ ഒഴിവാക്കിയതായും റിപ്പോർട്ടുകളുണ്ട്.