കളിക്കുന്നതിനിടെ തല കുക്കറിനകത്തായി; 45 മിനിറ്റ് നീണ്ട ശ്രമഫലത്തിനൊടുവിൽ ഒരു വയസുകാരിയെ രക്ഷപ്പെടുത്തി

രാജ്കോട്ട്: കളിക്കുന്നതിനിടെ ഒരു വയസുള്ള പെൺകുഞ്ഞിന്റെ തല അബദ്ധത്തിൽ കുക്കറിനുള്ളിൽ കുടുങ്ങി. രാജ്കോട്ടിലെ ഭാവ്നഗറിലാണ് സംഭവം ഉണ്ടായത്.

പ്രിയാൻഷി വാലാ എന്ന കുഞ്ഞിന്റെ തലയാണ് കുക്കറിനുള്ളിലായത്. വെള്ളിയാഴ്ചയാണ് സംഭവം നടന്നത്.

കുഞ്ഞിനെ അച്ഛനമ്മമാർ ഉടൻ തന്നെ സർക്കാർ ആശുപത്രിയിൽ എത്തിച്ചു. സർ ടി ആശുപത്രിയിലെ ഡോക്ടർമാർക്ക് വലിയ വെല്ലുവിളി തന്നെയായിരുന്നു ഇത്.

ആശുപത്രിയിലെ ഓർത്തോ പീഡിയാട്രിക് മുതൽ പീഡിയാട്രിക് വിഭാഗം വരെ കുഞ്ഞിനെ രക്ഷിക്കാനെത്തി. പക്ഷെ എല്ലാ ശ്രമവും വിഫലമായി.

ഒടുവില്‍ കുക്കർ മുറിച്ച് തല പുറത്തെടുക്കാൻ ഡോക്ടർമാരുടെ സംഘം തീരുമാനിക്കുകയായിരുന്നു. 45 മിനിറ്റ് നീണ്ട ശ്രമഫലത്തിനൊടുവില്‍ കുക്കർ മുറിച്ച് കുഞ്ഞിൻറെ തല പുറത്തെടുത്തു.

കുഞ്ഞിന്റെ ആരോഗ്യനില തൃപ്തികരമാണ്. ഭാവ് നഗറിലെ പിർച്ചാല സ്ട്രീറ്റിൽ താമസിക്കുന്ന ധർമികഭായ് വാലയുടെ മകളാണ് പ്രിയാൻഷി.