COVID 19 | യുഎഇയിൽ മരണസംഖ്യ 12 ആയി; ആകെ വൈറസ് ബാധിതർ 2359

ദുബായ്: ചികിത്സയിലിരുന്ന ഒരു ഏഷ്യക്കാരൻ കൂടി മരിച്ചതോടെ യുഎഇയിൽ  കോവിഡ് 19 ബാധിച്ച്  മരിച്ചവരുടെ എണ്ണം 12 ആയി.

കഴിഞ്ഞ ദിവസം പുതിയതായി 283 പേർക്കാണ് ഇവിടെ രോഗം സ്ഥിരീകരിച്ചത്. ഇതോടെ ആകെ വൈറസ് ബാധിതരുടെ എണ്ണം  2359 ആയി ഉയർന്നിട്ടുണ്ട്.

ഇതിൽ കഴിഞ്ഞ ദിവസം രോഗമുക്തരായ  19 പേർ ഉൾപ്പെടെ ആകെ  186 പേർ രോഗമുക്തരായതായും ആരോഗ്യമന്ത്രാലയം അറിയിച്ചിട്ടുണ്ട്.

സമ്പർക്ക പട്ടിക വിപുലീകരണത്തിലൂടെയും സ്ക്രീനിംഗിലൂടെയുമാണ് പുതിയ രോഗികളെ കണ്ടെത്തിയത്. ഇവരുടെയെല്ലാം ആരോഗ്യനില തൃപ്തികരമാണെന്നും അധികൃതർ അറിയിച്ചിട്ടുണ്ട്.

മുൻകരുതലുകളെടുക്കാത്തത് കൊണ്ടും സാമൂഹിക അകലം, ഹോം ക്വാറന്റൈൻ തുടങ്ങിയ നിര്‍ദേശങ്ങൾ പാലിക്കാത്തതു കൊണ്ടുമാണ് പലരും  വൈറസ് ബാധിതരായിരിക്കുന്നതെന്നും അധികൃതർ അറിയിച്ചിട്ടുണ്ട്.

കോവിഡ്  19 പ്രതിരോധിക്കാൻ സർക്കാർ നിർദേശങ്ങൾ കൃത്യമായി അനുസരിക്കണമെന്നും സാമൂഹിക അകലം എന്നത് കർശനമായി തന്നെ പാലിക്കണമെന്നും ആരോഗ്യ മന്ത്രാലയം വ്യക്തമാക്കിയിട്ടുണ്ട്.