ഭൂട്ടാന് ഇന്ത്യയുടെ സമ്മാനം; 1.5 ലക്ഷം ഡോസ് കോവിഷീൽഡ് വാക്സിനുകൾ കയറ്റി അയച്ചു

മുംബൈ: ഭൂട്ടാന് 1.5 ലക്ഷം ഡോസ് കോവിഷീൽഡ് വാക്സിൻ സമ്മാനമായി നൽകി ഇന്ത്യ. ഭൂട്ടാനിലെ തിംഭുവിലേക്കുള്ള വാക്സിൻ രാവിലെ മുംബൈ ഛത്രപതി ശിവജി രാജ്യാന്തര വിമാനത്താവളത്തിൽ നിന്ന് കയറ്റി അയച്ചു.

സെറം ഇൻസ്റ്റിറ്റ്യൂട്ടാണ് കോവിഷീൽഡ് വാക്സിന്റെ ഉല്‍പാദകർ. കോവിഡ് വാക്സിൻ മറ്റു രാജ്യങ്ങൾക്ക് നൽകുമെന്ന് ഇന്ത്യ നേരത്തെ അറിയിച്ചിരുന്നു. ഇതിൽ ആദ്യമായി വാക്സിൻ ലഭിക്കുന്ന രാജ്യമാണ് ഭൂട്ടാൻ.

പാരസെറ്റമോൾ, ഹൈഡ്രോക്സിക്ലോറോക്വിൻ, പിപിഇ, എൻ 95 മാസ്കുകൾ, എക്സ്-റേ മെഷീനുകൾ, ടെസ്റ്റ് കിറ്റുകൾ എന്നിവ ഉൾപ്പെടെ 2.8 കോടിയിൽ അധികം രൂപയുടെ ഉൽപന്നങ്ങൾ ഇന്ത്യ കോവിഡ് കാലത്ത് ഭൂട്ടാന് ​​നൽകിയിട്ടുണ്ട്.

മൂന്നാം രാജ്യങ്ങളിൽ കുടുങ്ങിക്കിടക്കുന്ന 14 ഭൂട്ടാൻ പൗരന്മാരെ വന്ദേ ഭാരത് വിമാനങ്ങളിലൂടെ ഇന്ത്യയിലേയ്ക്ക് തിരിച്ചയക്കുന്നതിനും ഇവരെ ഭൂട്ടാനിൽ എത്തിക്കുന്നതിനും ഇന്ത്യ നടപടി സ്വീകരിച്ചിരുന്നു.

ഭൂട്ടാനുമായി സുരക്ഷിതമായ 'ട്രാൻസ്പോർട്ട് ബബിൾ' കരാറിലും ഇന്ത്യ ഏർപ്പെട്ടു.ഇന്ത്യയുടെ വിവിധ ഭാഗങ്ങളിൽ കുടുങ്ങിയ രണ്ടായിരത്തിലധികം ഭൂട്ടാൻ പൗരന്മാരെ തിരിച്ചയക്കാൻ ഇന്ത്യ സൗകര്യമൊരുക്കിയിരുന്നു.

കോവിഡ് കാലഘട്ടത്തിൽ വ്യാപാരം, ഗതാഗതം എന്നിവ സുഗമമാക്കണമെന്ന ഭൂട്ടാൻ സർക്കാരിന്റെ അഭ്യർഥന മാനിച്ച് ഇന്ത്യ നിരവധി നടപടികൾ കൈക്കൊണ്ടിട്ടുണ്ട്. ടോർഷ ടീ ഗാർഡൻ (ഇന്ത്യ), അഹ്ലേ (ഭൂട്ടാൻ) വഴി പുതിയ വ്യാപാര റൂട്ട് തുറക്കുക.

നാഗർകാട്ട, അഗർത്തല, പാണ്ഡു, ജോഗിഗോപ നദീതട തുറമുഖങ്ങളിലെ പുതിയ വ്യാപാര കേന്ദ്രങ്ങൾ ഉടൻ പ്രവർത്തനം ആരംഭിക്കുമെന്നും വൃത്തങ്ങൾ അറിയിച്ചു. അതേസമയം, ആഗോള സമൂഹത്തിന്റെ ആരോഗ്യ പരിപാലന ആവശ്യങ്ങൾ നിറവേറ്റുന്നതിൽ ദീർഘകാലമായി വിശ്വസ്തനായ പങ്കാളിയെന്ന നിലയിൽ ഇന്ത്യ അഭിമാനിക്കുന്നുവെന്ന് പ്രധാനമന്ത്രി നരേന്ദ്ര മോദി പറഞ്ഞു.