തിരുവനന്തപുരത്ത് വീണ്ടും ലഹരി വേട്ട; 100 കിലോ കഞ്ചാവും 4 കോടിയുടെ ഹാഷീഷ് ഓയിലും പിടിച്ചെടുത്തു

തിരുവനന്തപുരം: കിളിമാനൂരിൽ നിന്നും നൂറു കിലോ കഞ്ചാവും നാല് കോടിയോളം രൂപ വിലമതിക്കുന്ന മൂന്ന് കിലോ ഹാഷിഷ് ഓയിലും പിടികൂടി. കിളിമാനൂർ- ആറ്റിങ്ങൽ റോഡിൽ വെള്ളംകൊള്ളിയിൽ നിന്നും രണ്ട് ബൊലേറോ പിക്കപ്പ് വാഹനങ്ങളിൽ നിന്നാണ് എക്സൈസ് എൻഫോഴ്‌സ്മെന്റ് സ്ക്വാഡ്‌ കഞ്ചാവും ഹാഷിഷ് ഓയിലും പിടികൂടിയത്.

സംഭവവുമായി ബന്ധപ്പെട്ട് ആറ്റിങ്ങൽ ആലംകോട് സ്വദേശികളായ ജെസീം, റിയാസ് എന്നിവരെയുംതൃശൂർ സ്വദേശി ഫൈസൽ, കോന്നി സ്വദേശി നിയാസ് എന്നിവരെയും കസ്റ്റഡിയിലെടുത്തു.

എക്സൈസ് മന്ത്രിയുടെ പ്രത്യേക നിർദേശ പ്രകാരം രൂപീകരിച്ച സ്ക്വാഡ് ആണ് റെയ്ഡ് നടത്തിയത്. കഴിഞ്ഞ ആഴ്ച ആറ്റിങ്ങലിനു സമീപത്തുനിന്നും വൻ കഞ്ചാവ് ശേഖരം പിടികൂടിയിരുന്നു.

അയൽ സംസ്ഥാനങ്ങളിൽ നിന്നും കേരളത്തിലേക്ക് വ്യാപകമായ തോതിൽ ലഹരിവസ്തുക്കൾ എത്തുന്നു എന്ന് കണ്ടെത്തിയതിനെ തുടർന്നായിരുന്നു പരിശോധന.

തെരഞ്ഞെടുപ്പ് മുന്നിൽകണ്ട് സംസ്ഥാനത്തേക്ക് കൂടുതൽ ലഹരിവസ്തുക്കൾ വരാൻ ഇടയുണ്ടെന്നാണ് എക്സൈസ് വിലയിരുത്തൽ. തുടർച്ചയായ റെയ്ഡുകൾ നടക്കുന്നതിനിടയിലും സംസ്ഥാനത്തേക്ക് നിർബാധം ലഹരിവസ്തുക്കൾ കടത്തുകയാണ്.

കഞ്ചാവ് മാഫിയയുടെ സംസ്ഥാനത്തെ ബന്ധങ്ങളെ സംബന്ധിച്ചും എക്സൈസ് പരിശോധന നടത്തുന്നുണ്ട്.

News18

News18