Union Budget 2026: നീലലോഹിത നിറത്തിൽ സുവർണ ചതുരങ്ങളുള്ള കാഞ്ചീപുരം പട്ടുസാരിയിൽ തിളങ്ങി നിർമല സീതാരാമൻ

ഒൻപതാം ബജറ്റ് അവതരണത്തിനായി ധനമന്ത്രി നിർമ്മല സീതാരാമൻ തിരഞ്ഞെടുത്തത് തമിഴ്‌നാടിന്റെ പാരമ്പര്യം വിളിച്ചോതുന്ന കൈത്തറി കാഞ്ചീപുരം പട്ടുസാരിയാണ്. ഈ സാരി തമിഴ് സംസ്കാരത്തിന്റെ പ്രതീകമാണ്. തമിഴ്‌നാട്ടിൽ നിയമസഭാ തിരഞ്ഞെടുപ്പ് നടക്കാനിരിക്കുന്ന വർഷം കൂടിയാണിത്. അതിനാൽ, തമിഴ്‌നാടിനുള്ള ആദരമായാണ് ഇത്തവണത്തെ കാഞ്ചീപുരം സാരിയെ വിലയിരുത്തുന്നത്. ബജറ്റ് പ്രഖ്യാപനങ്ങൾക്കൊപ്പം തന്നെ ഓരോ വർഷവും നിർമ്മല സീതാരാമൻ തിരഞ്ഞെടുക്കുന്ന വസ്ത്രധാരണം എപ്പോഴും ശ്ര​ദ്ധയാകാറുണ്ട്.

ഇത്തവണത്തെ മജന്ത നിറത്തിലെ സാരിയിൽ സ്വർണ്ണനിറത്തിലുള്ള ചതുരങ്ങൾ ആലേഖനം ചെയ്തിട്ടുണ്ട്. നീലലോഹിതം എന്നു പറയാവുന്ന നിറമാണ് മജന്ത. സങ്കീർണ്ണമായ നൂൽവേലകളോടു കൂടിയ കോഫി ബ്രൗൺ ബോർഡറാണ് സാരിക്കുള്ളത്. മഞ്ഞ നിറത്തിലുള്ള ഫുൾ ഹാൻഡ് ബ്ലൗസാണ് ഇതിനൊപ്പം അവർ അണിഞ്ഞത്.

വിവാഹങ്ങൾക്കും വിശേഷാവസരങ്ങൾക്കും അണിയുന്ന കാഞ്ചീപുരം സാരികൾ അതിന്റെ ഗുണമേന്മയുള്ള പട്ടിനും സവിശേഷമായ നെയ്ത്തുരീതിക്കും പ്രശസ്തമാണ്. ചോള രാജവംശത്തിന്റെ (9 മുതൽ 13 വരെ നൂറ്റാണ്ടുകൾ) കാലത്താണ് ഈ നെയ്ത്തുപാരമ്പര്യം വളർന്നുവന്നത്. ക്ഷേത്ര ശില്പകലകളിൽ നിന്നും മറ്റും പ്രചോദനം ഉൾക്കൊണ്ടുള്ള രൂപങ്ങളാണ് ഈ സാരികളിൽ സാധാരണയായി നെയ്തെടുക്കാറുള്ളത്.

കഴിഞ്ഞ ഒൻപത് വർഷങ്ങളിൽ ഇന്ത്യയുടെ വിവിധ ഭാഗങ്ങളിലെ നെയ്ത്തുകാരെയും കരകൗശലവിദ്യയെയും ആദരിച്ചുകൊണ്ട് നിർമ്മല സീതാരാമൻ ധരിച്ച സാരികൾ ഇവയാണ്: 2025: മധുബാനി കല (ബീഹാർ): പത്മശ്രീ ജേതാവ് ദുലാരി ദേവി സമ്മാനിച്ച ഓഫ്-വൈറ്റ് സിൽക്ക് സാരിയായിരുന്നു 2025-ലേത്. ബീഹാറിലെ പ്രശസ്തമായ മധുബാനി ചിത്രകലയിലെ മത്സ്യം, താമര രൂപങ്ങൾ ഇതിൽ ആലേഖനം ചെയ്തിരുന്നു.

2024 (പൂർണ്ണ ബജറ്റ്): മംഗൾഗിരി (ആന്ധ്രാപ്രദേശ്): മജന്ത ബോർഡറുള്ള ഓഫ്-വൈറ്റ് മംഗൾഗിരി കൈത്തറി സാരിയാണ് അന്ന് അണിഞ്ഞത്. ആന്ധ്രയുടെ തനത് നെയ്ത്തു പാരമ്പര്യമായിരുന്നു ഇതിലൂടെ ഉയർത്തിക്കാട്ടിയത്.

2024 (ഇടക്കാല ബജറ്റ്): കാന്ത സ്റ്റിച്ച് (പശ്ചിമ ബംഗാൾ): പശ്ചിമ ബംഗാളിന്റെ പ്രശസ്തമായ കാന്ത എംബ്രോയ്ഡറി ചെയ്ത നീല നിറത്തിലെ സിൽക്ക് സാരിയായിരുന്നു ധനമന്ത്രിയുടെ വേഷം.

2023: ഇൽക്കൽ പട്ടുസാരി (കർണാടക): കർണാടകയിലെ ധാർവാഡ് മേഖലയിലെ കാസൂതി എംബ്രോയ്ഡറി ചെയ്ത ചുവന്ന സാരി. രഥങ്ങൾ, ആനകൾ, ഗോപുരങ്ങൾ എന്നിവ ഉൾക്കൊള്ളുന്ന അപൂർവ്വമായ കലാരൂപമായിരുന്നു ഇത്.

2022: ബോംകായ് (ഒഡീഷ): ഒഡീഷയിലെ ഗഞ്ചം ജില്ലയിൽ നിന്നുള്ള ബ്രൗൺ ബോംകായ് സാരി. പ്രതിരോധത്തിന്റെയും കരുത്തിന്റെയും പ്രതീകമായാണ് ഈ നിറത്തെ കണക്കാക്കുന്നത്.

2021: പോച്ചംപള്ളി ഇക്കത്ത് (തെലങ്കാന): തെലങ്കാനയുടെ പ്രശസ്തമായ പോച്ചംപള്ളി നെയ്ത്തിലുള്ള ചുവപ്പും ഓഫ് വൈറ്റും കലർന്ന സാരിയാണ് അന്ന് തിരഞ്ഞെടുത്തത്.

2020: മഞ്ഞപ്പട്ടും നീല ബോർഡറും: ഐശ്വര്യത്തിന്റെ പ്രതീകമായ മഞ്ഞ നിറത്തിലുള്ള പട്ടുസാരിയാണ് അന്ന് ധരിച്ചത്.

2019: പിങ്ക് മംഗൾഗിരി (ആന്ധ്രാപ്രദേശ്): ആദ്യ ബജറ്റ് അവതരണത്തിന് പിങ്ക് മംഗൾഗിരി സാരിയാണ് ധരിച്ചത്. അന്ന് കൊളോണിയൽ കാലത്തെ ബ്രീഫ്കേസിന് പകരം പരമ്പരാഗതമായ 'ബഹി ഖാത്ത' (ചുവന്ന തുണിയിൽ പൊതിഞ്ഞ് ബജറ്റ്) കൊണ്ടുവന്നത് വലിയ വാർത്തയായിരുന്നു. നിർമ്മല സീതാരാമന്റെ ഓരോ വർഷത്തെയും സാരി തിരഞ്ഞെടുപ്പ് ബി.ജെ.പിയുടെ ആ വർഷത്തെ രാഷ്ട്രീയ-തിരഞ്ഞെടുപ്പ് ലക്ഷ്യങ്ങളുടെ സൂചനയായും രാഷ്ട്രീയ നിരീക്ഷകർ വിലയിരുത്താറുണ്ട്.