Guinness Pakru | പിറന്നാള്‍ സമ്മാനം കണ്ട് ഞെട്ടി നടന്‍ ഗിന്നസ് പക്രു; ഒറിജിനല്‍ ഏതാണെന്ന് സംശയിച്ച് കാഴ്ചക്കാരും

മലയാളത്തിന്റെ പ്രിയ നടൻ ഗിന്നസ് പക്രുവിന് പിറന്നാൾ ദിനത്തിൽ ഒരു സമ്മാനം കിട്ടി. വെറും സമ്മാനം എന്ന് പറഞ്ഞാല്‍ പോരാ ആരെയും ഞെട്ടിക്കുന്ന ഒരു സമ്മാനം. കലാകാരനായ ഹരികുമാർ കുമ്പനാട്  നിര്‍മ്മിച്ച പക്രുവിന്‍റെ മെഴുക് പ്രതിമയാണ് ആ ഞെട്ടിക്കുന്ന സമ്മാനം. കോട്ടയം പ്രസ് ക്ലബ്ബില്‍ നടന്ന ചടങ്ങിലാണ് പ്രതിമ അനാശ്ചാദനം ചെയ്തത്.

ഒറ്റ നോട്ടത്തില്‍ സാക്ഷാല്‍ ഗിന്നസ് പക്രു തന്നെ.. അത്ര സൂക്ഷമമായാണ് ഹരികുമാർ കുമ്പനാട് പ്രതിമ നിര്‍മ്മിച്ചിരിക്കുന്നത്. വേദിയിലെത്തിയ പ്രകുവിന്‍റെ അതേ വസ്ത്രം ധരിച്ച പ്രതിമ കണ്ട കാണികളും ആദ്യം ഒന്ന് അമ്പരന്നു.. ഇതില്‍ ഏതാണ് ഒറിജിനല്‍ ?

കാണാതായ ഇരട്ടസഹോദരനെ കണ്ടെത്തിയ സന്തോഷമാണ് സ്വന്തം മെഴുകു പ്രതിമ കണ്ടപ്പോള്‍ തോന്നിയതെന്ന് ഗിന്നസ് പക്രു പറഞ്ഞു.

ജീവിതത്തില്‍ നമ്മള്‍ പ്രതീക്ഷിക്കാത്ത ഒരുപാട് കാര്യങ്ങള്‍ സംഭവിച്ചിട്ടുണ്ട്. നമ്മളും കലാമേഖലയില്‍ നില്‍ക്കുന്നത് കൊണ്ട് തന്നെ ഒരു കലാകാരന്റെ ഏറ്റവും വലിയൊരു മികവാണ് ഇവിടെ കാണുന്നത്. എനിക്കിത് ഭയങ്കര അത്ഭുതമായി പോയി. ശില്‍പി ഹരികുമാര്‍ തന്നെ അത്ഭുതപ്പെടുത്തിയെന്നും പക്രു പറഞ്ഞു. 

മമ്മൂട്ടി മോഹൻ ലാൽ മൈക്കിൾ ജാക്സൺ എന്നിവരുടെ പ്രതിമകൾ ഹരികുമാർ നിർമ്മിച്ചിട്ടുണ്ട്. തന്റെ മ്യൂസിയത്തിൽ ഇനി പക്രുവും ഉണ്ടാകുമെന്ന് ഹരികുമാർ പറയുന്നു.

രണ്ടുമാസത്തെ പരിശ്രമത്തിനു ഒടുവിൽ ആണ്  ജീവൻ തുടിക്കുന്ന പ്രതിമ നിർമ്മിച്ചത്. (ചിത്രങ്ങള്‍: Prasanth Joseph Pullattu)