Yash| സംവിധായകർക്ക് സിഗരറ്റും ചായയും എത്തിച്ചു കൊടുത്തു, അപമാനിതനായി; കഴിഞ്ഞ കാലം ഓർത്തെടുത്ത് യാഷ്

ഇന്ത്യയിൽ ഏറ്റവും വലിയ സൂപ്പർ ഹിറ്റ് ചിത്രത്തിലെ നായകനാണ് കന്നഡ താരം യാഷ് (Yash). കന്നഡ സിനിമയിൽ നിന്നെത്തി ഇന്ത്യ മുഴുവനുമുള്ള ആരാധകരെയാണ് കെജിഎഫ് (KGF)എന്ന ചിത്രത്തിലൂടെ യാഷ് സ്വന്തമാക്കിയത്.

ഏറ്റവും താരമൂല്യമുള്ള നടനെന്ന ഖ്യാതി നേടിയെട്ടും ആരാധകരോടുള്ള വിനയത്തോടെയുള്ള പെരുമാറ്റമാണ് ഏറ്റവും ശ്രദ്ധേയം. താരരാജാവെന്ന് ഉറപ്പിച്ച് പറയാം യാഷിനെ.

എന്നാൽ ഇന്ന് എത്തി നിൽക്കുന്ന താര പദവിയിലേക്കുള്ള യാത്ര അത്ര സുഖകരമായിരുന്നില്ല. മുമ്പ് പല അഭിമുഖങ്ങളിലും ഒന്നുമില്ലായ്മയിൽ നിന്നുമുള്ള തന്റെ വളർച്ചയെ കുറിച്ച് യാഷ് പറഞ്ഞിട്ടുണ്ട്.

ടിവി 9 ന് നൽകിയ അഭിമുഖത്തിൽ വായിൽ വെള്ളിക്കരണ്ടിയുമായി ജനിച്ചയാളല്ലെന്ന് യാഷ് ഒരിക്കൽ കൂടി പറയുകയാണ്. സിനിമാ ലോകത്ത് ആദ്യ കാലത്ത് താൻ അനുഭവിച്ച കഷ്ടപ്പാടുകളെ കുറിച്ചും യാഷ് പറയുന്നുണ്ട്.

സാന്റൽവുഡിൽ നായകനായി എത്തുന്നതിന് മുമ്പ് അസിസ്റ്റന്റ് ഡയറക്ടറുടെ വേഷത്തിലായിരുന്നു യാഷ് ഉണ്ടായിരുന്നത്. സംവിധായകർക്ക് ചായയും സിഗരറ്റും ഭക്ഷണവും എത്തിച്ചുകൊടുക്കലായിരുന്നു അന്ന് തന്റെ പ്രധാന പണിയെന്ന് യാഷ് പറയുന്നു.

സിനിമാ ലോകത്ത് അസിസ്റ്റ് ഡയറക്ടർമാരെ എങ്ങനെയാണ് ഉപയോഗിച്ചിരുന്നത് എല്ലാവർക്കും അറിയാം. സെറ്റിലെ എല്ലാ ജോലികളും അവർ ചെയ്യണം,സംവിധായകരുടെ ജോലി ഒഴിച്ച്- അഭിമുഖത്തിൽ യാഷ് പറയുന്നു.

"സംവിധായകർക്ക് രാവിലെ ബ്രേക്ക് ഫാസ്റ്റും ചായയും സിഗരറ്റും എത്തിച്ചു നൽകാനായിരുന്നു എന്നോട് ആവശ്യപ്പെട്ടിരുന്നത്. ഇത് എന്റെ അഭിമാനത്തെ പലവട്ടം വേദനിപ്പിച്ചിട്ടുണ്ട്".

താനിതൊക്കെ ചെയ്യേണ്ടതുണ്ടോ എന്ന് പലവട്ടം സ്വയം ചോദിച്ചിട്ടുണ്ട്. പക്ഷേ, ഒരു പരാജയമായി തിരികേ വീട്ടിലേക്ക് മടങ്ങാൻ മാത്രം ആഗ്രഹിച്ചിരുന്നില്ല. ഈ സമയത്ത് പലരും തോൽവി സമ്മതിച്ച് തിരിച്ചു പോയി. എന്നാൽ, തനിക്ക് ചിലത് നേടാനുണ്ടായിരുന്നതിനാൽ എല്ലാം സഹിച്ച് നിന്നു.

സെറ്റിൽ പലതവണ അപമാനിതനായ സംഭവങ്ങളെ കുറിച്ചും യാഷ് ഓർത്തെടുക്കുന്നു. ഭക്ഷണം കഴിക്കുമ്പോൾ സീനിയേഴ്സായവർക്കൊപ്പമിരുന്നാൽ തുറിച്ചു നോട്ടങ്ങൾ നേരിടേണ്ടി വന്നിട്ടുണ്ടെന്നും താരരാജാവ് പറയുന്നു.

ഇന്നത്തെ യാഷിന്റെ സമ്പന്നമായ ചുറ്റുപാടുകളെ കുറിച്ച് ആരാധകർക്കെല്ലാം അറിയാം. ഇതെല്ലാം സ്വന്തം കഠിനാധ്വാനത്തിലൂടെയും ആത്മസമർപ്പണത്തിലൂടെയുമാണ് താരം സ്വന്തമാക്കിയത്.

കർണാടകയിലെ ഒരു സാധാരണ മധ്യമവർഗ കുടുംബത്തിലാണ് യാഷ് ജനിച്ചു വളർന്നത്. കർണാടക ട്രാൻസ്പോർട്ട് ബസ് ഡ്രൈവറായിരുന്നു യാഷിന്റെ അച്ഛൻ. യാഷിന്റെ അച്ഛനെ കുറിച്ച് സംവിധായകൻ എസ്എസ് രാജമൗലി ഒരിക്കൽ പറഞ്ഞത് ഇങ്ങനെയായിരുന്നു,

ഒരു ബസ് ഡ്രൈവറുടെ മകനാണ് യാഷ് എന്നറിഞ്ഞപ്പോൾ താൻ ആശ്ചര്യപ്പെട്ടിരുന്നു. ഇന്നും അദ്ദേഹം ബസ് ഡ്രൈവറുടെ ജോലി ചെയ്യുന്നു. തന്നെ സംബന്ധിച്ചിടത്തോളം യഥാർത്ഥ സ്റ്റാർ യാഷിന്റെ അച്ഛനാണ്. എന്നായിരുന്നു രാജമൗലിയുടെ വാക്കുകൾ.

2004 ൽ നന്ദ് ഗോകുൽ എന്ന സീരിയലിലൂടെയാണ് യാഷ് അഭിനയരംഗത്ത് എത്തുന്നത്. ഇതിനു ശേഷം 'ജംബഡ ഹുഡുഗി', 'മിസ്റ്റർ ആന്റ് മിസിസ്സ് രാമചാരി', 'ഗൂഗിളി' തുടങ്ങിയ ചിത്രങ്ങളിൽ യാഷ് അഭിനയിച്ചു.