Sushant Singh Rajput |'ജീവിതത്തെക്കാളും നല്ലത് മരണമെന്ന് നിനക്ക് തോന്നിയെന്ന് ഓർക്കുമ്പോൾ തകർന്നു പോകുന്നു': കൃതി സാനോൺ

മുംബൈ: സുഷാന്ത് സിംഗ് രാജ്പുതിന്‍റെ അപ്രതീക്ഷിത വിയോഗത്തിലാണ് ബോളിവുഡ് ലോകം. താരത്തിന്‍റെ അടുത്ത സുഹൃത്തുക്കളിൽ പലരും ഇതുവരെ ആ ഞെട്ടലിൽ നിന്നും മുക്തരായിട്ടില്ല..

പ്രിയപ്പെട്ട സുഹൃത്തിന്‍റെ വിയോഗത്തിൽ ദുഃഖം പങ്കുവച്ചെത്തിയിരിക്കുകയാണ് അടുത്ത സുഹൃത്തും സഹപ്രവർത്തകയുമായ കൃതി സാനോൺ. 

റാബ്ത എന്ന ചിത്രത്തിൽ ഒന്നിച്ചഭിനയിച്ച ഇരുവരും തമ്മിൽ വളരെ അടുത്ത സൗഹൃദം സൂക്ഷിച്ചിരുന്നു. സുഷാന്തിന്‍റെ മരണാനന്തര ചടങ്ങുകളിൽ പങ്കെടുത്ത അപൂർവം താരങ്ങളിൽ ഒരാളും ക‍ൃതിയായിരുന്നു.

കഴിഞ്ഞ ദിവസമാണ് സുഷാന്തിനെ അനുസ്മരിച്ച് ഹൃദയം നുറുങ്ങുന്ന വേദന പങ്കുവയ്ക്കുന്ന കുറിപ്പ് കൃതി സോഷ്യൽ മീഡിയയിൽ പോസ്റ്റ് ചെയ്തത്.

'സുഷ്.. അതീവ ബുദ്ധിയുള്ള മനസ് തന്നെയാണ് നിന്‍റെ ഏറ്റവും അടുത്ത സുഹൃത്തും ഏറ്റവും മോശം ശത്രുവും എന്ന് എനിക്കറിയാം.. പക്ഷെ മരണമാണ് ജീവിക്കുന്നതിനെക്കാൾ എളുപ്പമെന്ന് തോന്നിയ ഒരു നിമിഷം നിനക്ക് ജീവിതത്തിലുണ്ടായി എന്നോർക്കുമ്പോൾ തകർന്നു പോവുകയാണ്.. ആ നിമിഷം കടന്നു പോകാൻ നിനക്കൊപ്പം ആരെങ്കിലും ഉണ്ടായിരുന്നുവെങ്കിൽ എന്ന് ഞാൻ ആഗ്രഹിച്ച് പോവുകയാണ്..

നിന്നെ സ്നേഹിച്ചവരെ നീ അകറ്റി നിര്‍ത്തിയില്ലായിരുന്നുവെങ്കിൽ എന്ന് ഞാൻ ആഗ്രഹിച്ചു പോവുകയാണ്.. നിന്‍റെ ഉള്ളിൽ തകർന്നു കൊണ്ടിരുന്ന എന്തോ ഒരു കാര്യം നേരെയാക്കാൻ എനിക്ക് കഴിഞ്ഞിരുന്നുവെങ്കിലെന്ന് ഞാൻ ആഗ്രഹിക്കുകയാണ്.. പക്ഷെ കഴിഞ്ഞില്ല.. പല കാര്യങ്ങളും ഞാൻ ഇപ്പോൾ ആഗ്രഹിക്കുന്നുണ്ട്..

എന്‍റെ ഹൃദയത്തിന്‍റെ ഒരു ഭാഗം നിനക്കൊപ്പം തന്നെയുണ്ട്.. മറ്റൊരു ഭാഗം നിന്നെ എപ്പോഴും ജീവിപ്പിച്ചു നിർത്തും.. നിന്‍റെ സന്തോഷത്തിന് വേണ്ടി പ്രാർഥിക്കുന്നത് ഒരിക്കലും നിർത്തിയിരുന്നില്ല.. അതൊരിക്കലും നിർത്തുകയുമില്ല.. ' ക‍ൃതി കുറിച്ചു.

രണ്ട് ദിവസം മുൻപാണ് ബോളിവുഡിലെ മുൻനിര താരങ്ങളിലൊരാളായ സുഷാന്ത് സിംഗ് രാജ്പുതിനെ വീട്ടിൽ തൂങ്ങിമരിച്ച നിലയിൽ കണ്ടെത്തിയത്. ഇത്തരമൊരു കടുംകൈയ്ക്ക് താരത്തെ പ്രേരിപ്പിച്ചതെന്താണെന്ന് ഇതുവരെ വ്യക്തമായിട്ടില്ലെങ്കിലും വിഷാദരോഗമാണ് ഇതിലേക്ക് നയിച്ചതെന്നാണ് പറയപ്പെടുന്നത്.