ആ വേഷം ചെയ്യേണ്ടിയിരുന്നത് നയൻതാരയായിരുന്നില്ല; ജവാനിൽ ഷാരൂഖിന്റെ നായികയായി ആദ്യം സമീപിച്ചത് സാമന്തയെ?

ബോളിവുഡിൽ ഇതുപോലൊരു അരങ്ങേറ്റമാണ് ഏതൊരു നായികയും ആഗ്രഹിക്കുന്നത്. തെന്നിന്ത്യയിൽ ലേഡി സൂപ്പർ സ്റ്റാർ എന്ന വിളിപ്പേരുള്ള നയൻതാരയുടെ പ്രഭാവം ജവാനിലൂടെ ബോളിവുഡ് പ്രേക്ഷകരും മനസ്സിലാക്കി.

ആറ്റ്ലീ ആദ്യമായി സംവിധാനം ചെയ്ത ചിത്രത്തിൽ ഷാരൂഖിനൊപ്പം പ്രധാന വേഷത്തിലെത്തിൽ എത്തിയവരെല്ലാം തെന്നിന്ത്യയിലെ സൂപ്പർ താരങ്ങളാണ്. വിജയ് സേതുപതിയാണ് ചിത്രത്തിൽ വില്ലൻ കഥാപാത്രത്തെ അവതരിപ്പിച്ചത്.

അതേസമയം, ജവാനിൽ നായികയായി ആറ്റ്ലീ ആദ്യം സമീപിച്ചത് നയൻതാരയെ ആയിരുന്നില്ലെന്നാണ് റിപ്പോർട്ടുകൾ. നേരത്തേ ഇതുസംബന്ധിച്ച വാർത്തകൾ വന്നിരുന്നെങ്കിലും ജവാൻ സൂപ്പർ ഹിറ്റായതിനു പിന്നാലെ വാർത്തകൾ വീണ്ടും സജീവമായിരിക്കുകയാണ്.

സാമന്തയെ ആയിരുന്നു ജവാനിൽ നായികയായി ആദ്യം തീരുമാനിച്ചിരുന്നത് എന്നാണ് റിപ്പോർട്ടുകൾ. ഇതുസംബന്ധിച്ച് ഔദ്യോഗിക വിശദീകരണങ്ങൾ ഒന്നും ലഭ്യമല്ല. ഷാരൂഖ് ഖാൻ ചിത്രത്തിൽ നായികയായുള്ള അവസരം സാമന്ത വേണ്ടെന്നു വെക്കുകയായിരുന്നുവത്രേ.

2019 ലാണ് ജവാന്റെ അണിയറ പ്രവർത്തകർ ചിത്രത്തിനായി സാമന്തയെ സമീപിച്ചത്. ഈ സമയത്ത് നടൻ നാഗചൈതന്യയുമായി ഒന്നിച്ചായിരുന്നു സാമന്ത. നാഗ ചൈതന്യയ്ക്കൊപ്പം കുടുംബം ഉണ്ടാക്കാൻ തീരുമാനിച്ചിരുന്നതിനാൽ സാമന്ത ചിത്രത്തോട് നോ പറയുകയായിരുന്നുവെന്നാണ് റിപ്പോർട്ട്.

സാമന്ത നോ പറഞ്ഞതോടെയാണ് നയൻതാരയെ തേടി ജവാൻ എത്തുന്നത്. കോവിഡ് പ്രതിസന്ധിക്കു ശേഷം ചിത്രത്തിന്റെ ഷൂട്ടിങ് ആരംഭിക്കുകയും ചെയ്തു. അതേസമയം, നാഗചൈതന്യയുമായി സാമന്ത പിന്നീട് പിരിയുകയും ചെയ്തു.

വാർത്തകൾ സത്യമാണെങ്കിലും അല്ലെങ്കിലും, സിനിമ സൂപ്പർ ഹിറ്റായതിനു പിന്നാലെ, നയൻതാരയെ അഭിനന്ദിച്ച് ആദ്യം സോഷ്യൽമീഡിയയിൽ പോസ്റ്റിട്ടവരിൽ ഒരാൾ സാമന്തയായിരുന്നു.