അബുദാബി ക്ഷേത്രം: ഉദ്ഘാടനച്ചടങ്ങിന് മുന്നോടിയായുള്ള ഫെസ്റ്റിവൽ ഓഫ് ഹാർമണിക്ക് തുടക്കമായി

അബുദാബി : അബുദാബിയിലെ ക്ഷേത്ര(Hindu BAPS Mandir) ഉദ്ഘാടനം ഫെബ്രുവരി 14ന് നടക്കാനിരിക്കെ ചടങ്ങിനു മുന്നോടിയായുള്ള പ്രധാന ആഘോഷപരിപാടികൾക്ക് തുടക്കമായി.

ഫെസ്റ്റിവൽ ഓഫ് ഹാർമണി എന്ന പേരിലുള്ള ആഘോഷ പരിപാടി ഈ മാസം 21 വരെ നീണ്ടുനിൽക്കും. ഫെബ്രുവരി 14 ന് ഉദ്ഘാടനം ചെയ്യുമെങ്കിലും ഫെബ്രുവരി 18 ന് മാത്രമേ പൊതു ജനങ്ങൾക്കായി തുറന്ന് കൊടുക്കുകയുള്ളൂ.

ഓൺലൈൻ വഴി ദർശനത്തിന് രജിസ്റ്റർചെയ്തവർക്കാണ് ഈ മാസം 18-ന് പ്രവേശനം നൽകും.അബുദാബിയില്‍ പണിതുയര്‍ത്തുന്ന ഹൈന്ദവ ക്ഷേത്രം ഉ​​ദ്ഘാടനം പ്രധാനമന്ത്രി നരേന്ദ്രമോദിയാണ് നിർവഹിക്കുക.

യു.എ.ഇ. ഭരണാധികാരികളടക്കം ഒട്ടേറെ അറബ് പ്രമുഖർ പങ്കെടുക്കും. ഉദ്ഘാടനദിവസത്തിലെ പ്രധാന ചടങ്ങുകൾക്ക് മഹന്ത് സ്വാമി മഹാരാജ് നേതൃത്വംനൽകും. ബോചാസൻവാസി അക്ഷർ പുരുഷോത്തം സ്വാമി നാരായൺ സംസ്ഥയ്ക്ക് (ബാപ്‌സ്) കീഴിലാണ് ക്ഷേത്രം.

ഉദ്ഘാടനം കഴിയുന്നതോടെ മിഡിൽ ഈസ്റ്റിലെ ആദ്യ പരമ്പരാഗത ശിലാക്ഷേത്ര ദർശനത്തിന് വലിയ തിരക്കുണ്ടാകുമെന്നാണ് റിപ്പോർട്ട്. ഇതിനാൽ യുഎഇയിലുള്ളവർ മാർച്ച് 1 ന് ശേഷം മാത്രമേ ദർശനത്തിന് രജിസ്റ്റർ ചെയ്യാവൂ എന്ന് അധികൃതർ അറിയിച്ചു.

ദുബായ്-അബുദാബി ഹൈവേയിലെ അബു മുറൈഖയിൽ 27 ഏക്കർ സ്ഥലത്ത് പിങ്ക് മണൽക്കല്ലും വെള്ള മാർബിളും കൊണ്ടാണ് ക്ഷേത്രം നിർമിച്ചിരിക്കുന്നത്.

ബോച്ചസൻവാസി ശ്രീ അക്ഷര പുരുഷോത്തം സ്വാമിനാരായൺ സൻസ്ത എന്നതിന്റെ ചുരുക്കപ്പേരാണ് BAPS. യു.എ.ഇ സര്‍ക്കാരിന്റെ പങ്കാളിത്തതോടെ അബുദാബിയില്‍ പണിതുയര്‍ത്തുന്ന ഹൈന്ദവ ക്ഷേത്രം പൂര്‍ണമായും ഇന്ത്യന്‍ വാസ്തു വിദ്യയിലാണ് പണിയുന്നത്.

ക്ഷേത്രത്തിന്റെ നിര്‍മാണത്തിന് സ്റ്റീലോ ഇരുമ്പോ ഉപയോഗിച്ചിട്ടില്ല എന്നത് ഇതിന്റെ ഏറ്റവും വലിയ പ്രത്രേകതയാണ്.