6 വർഷത്തിനിടെ 22 സെഞ്ച്വറികൾ; സച്ചിനെക്കാൾ കൂടുതൽ റൺസ് നേടിയ ഒരേയൊരു ഇന്ത്യൻ താരം

ഇന്ത്യൻ ക്രിക്കറ്റ് ചരിത്രം പരിശോധിക്കുമ്പോൾ സച്ചിൻ ടെണ്ടുൽക്കർ (Sachin Tendulkar) എന്ന പേരിന് മുകളിൽ മറ്റൊരു പേരില്ലെന്ന് പലരും കരുതാറുണ്ട്. എന്നാൽ സ്ഥിതിവിവരക്കണക്കുകൾ പരിശോധിച്ചാൽ ഒരു പ്രത്യേക കാലയളവിൽ സാക്ഷാൽ സച്ചിൻ ടെണ്ടുൽക്കറെപ്പോലും പിന്നിലാക്കിയ ഒരു 'യുവസിംഹം' ഇന്ത്യക്കുണ്ടായിരുന്നു- മറ്റാരുമല്ല, ബംഗാൾ കടുവ സൗരവ് ഗാംഗുലി (Sourav Ganguly) . 1997 മുതൽ 2003 വരെയുള്ള ആറ് വർഷങ്ങൾ ഇന്ത്യൻ ക്രിക്കറ്റിലെ 'റെക്കോർഡുകളുടെ യുദ്ധത്തിനാണ്' സാക്ഷ്യം വഹിച്ചത്.

1972 ജൂലൈ 8-ന് കൊൽക്കത്തയിലെ അതിസമ്പന്നമായ ഒരു കുടുംബത്തിലാണ് ഗാംഗുലിയുടെ ജനനം. ചണ്ഡിദാസ്-നിരുപ ദമ്പതികളുടെ ഇളയ മകനായ സൗരവിന് ആഡംബരപൂർണ്ണമായ ജീവിതസാഹചര്യങ്ങൾ ഉള്ളതിനാൽ 'മഹാരാജ്' എന്ന വിളിപ്പേര് ലഭിച്ചു. പിതാവ് കൊൽക്കത്തയിലെ പ്രശസ്തനായ പ്രിന്റ് ബിസിനസുകാരനായിരുന്നു. യഥാർത്ഥത്തിൽ ഒരു ഫുട്ബോൾ പ്രേമിയായിരുന്ന ഗാംഗുലിയെ ക്രിക്കറ്റിലേക്ക് എത്തിച്ചത് ജ്യേഷ്ഠൻ സ്നേഹാശിഷ് ആയിരുന്നു. വലംകൈയ്യനായ ഗാംഗുലി ബാറ്റിംഗിൽ ഇടംകൈയ്യനായത് ജ്യേഷ്ഠന്റെ ക്രിക്കറ്റ് ഉപകരണങ്ങൾ ഉപയോഗിക്കുന്നതിന് വേണ്ടിയായിരുന്നു എന്നത് കൗതുകകരമാണ്.

1997 ഓഗസ്റ്റ് 20-ന് ശ്രീലങ്കയിലെ കൊളംബോയിൽ ഗാംഗുലി തന്റെ ആദ്യ ഏകദിന സെഞ്ച്വറി (113 റൺസ്) കുറിക്കുമ്പോഴാണ് ചരിത്രത്തിന് തുടക്കമാകുന്നത്. അന്ന് സച്ചിൻ ടെണ്ടുൽക്കർ ലോക ക്രിക്കറ്റിലെ അനിഷേധ്യ താരമായിരുന്നു. എന്നാൽ ഗാംഗുലിയുടെ വരവോടെ ഇന്ത്യൻ ബാറ്റിംഗിന്റെ ശക്തി ഇരട്ടിയായി. സച്ചിൻ ഒരു സെഞ്ച്വറി നേടിയാൽ തൊട്ടടുത്ത മത്സരങ്ങളിൽ ഗാംഗുലി മറുപടി നൽകുന്ന കാഴ്ചയാണ് പിന്നീട് കണ്ടത്.

1997 മുതൽ 2003 വരെയുള്ള ആറ് വർഷത്തിനുള്ളിൽ സച്ചിനും ഗാംഗുലിയും വിസ്മയിപ്പിക്കുന്ന പ്രകടനമാണ് കാഴ്ചവെച്ചത്. ഈ കാലയളവിൽ രണ്ടുപേരും ഏകദിനത്തിൽ 22 സെഞ്ച്വറികൾ വീതം നേടി ഒപ്പത്തിനൊപ്പം നിന്നു. 1999 ലോകകപ്പിൽ ശ്രീലങ്കയ്‌ക്കെതിരെ ഗാംഗുലി നേടിയ 183 റൺസും 2003 ലോകകപ്പിലെ മൂന്ന് സെഞ്ച്വറികളും ഇന്നും ക്രിക്കറ്റ് പ്രേമികളുടെ മനസ്സിലുണ്ട്.

ആറ് വർഷത്തെ കണക്കുകൾ വിശകലനം ചെയ്യുമ്പോൾ സച്ചിനേക്കാൾ മുന്നിലായിരുന്നു ഗാംഗുലി. ഇക്കാലയളവിൽ ഗാംഗുലി 7,829 റൺസ് നേടിയപ്പോൾ സച്ചിൻ നേടിയത് 7,525 റൺസാണ്. എതിരാളികളുടെ ബൗളിംഗിനെ തളർത്താൻ 10,000-ത്തിലധികം പന്തുകളാണ് ഗാംഗുലി നേരിട്ടത്. ആ സമയത്ത് അന്താരാഷ്ട്ര ഏകദിന ക്രിക്കറ്റിൽ ഏറ്റവും കൂടുതൽ റൺസ് നേടിയ താരവും മറ്റാരുമല്ലായിരുന്നു.

ഗാംഗുലിയും സച്ചിനും ഓപ്പണർമാരായി കളത്തിലിറങ്ങിയ കാലം ലോക ക്രിക്കറ്റിലെ ഏതൊരു ബൗളറെയും ഭയപ്പെടുത്തിയിരുന്നു. 2003 മാർച്ച് 20-ന് ലോകകപ്പ് സെമിഫൈനലിൽ കെനിയയ്‌ക്കെതിരെ ഗാംഗുലി തന്റെ 22-ാം സെഞ്ച്വറി (111*) നേടിയതോടെയാണ് ഈ സുവർണ്ണ കാലഘട്ടത്തിന്റെ ഒരു ഘട്ടം പൂർത്തിയായത്. ഗാംഗുലിയെ നാം മികച്ചൊരു ക്യാപ്റ്റനായി ആഘോഷിക്കുന്നുണ്ടെങ്കിലും, സച്ചിനോളം തന്നെ മികവുള്ള ഒരു ബാറ്റ്സ്മാനായിരുന്നു അദ്ദേഹം എന്ന സത്യം പലപ്പോഴും വിസ്മരിക്കപ്പെടുകയാണ്. ചരിത്രം സച്ചിനെ 'ക്രിക്കറ്റിന്റെ ദൈവം' എന്ന് വിളിക്കുമ്പോൾ, ദൈവത്തിനൊപ്പം തോളോട് തോൾ ചേർന്ന് നിന്ന് പൊരുതിയ ആ ബംഗാൾ കടുവയുടെ നേട്ടങ്ങളും സുവർണ്ണ ലിപികളിൽ എഴുതപ്പെടേണ്ടതാണ്.

ഏകദിനത്തിൽ 10,000 റൺസ് തികയ്ക്കുന്ന ലോകത്തിലെ മൂന്നാമത്തെ ബാറ്റ്സ്മാനാണ് ഗാംഗുലി. ആകെ 11,363 റൺസുമായി ലോകത്ത് ഒമ്പതാം സ്ഥാനത്താണ് അദ്ദേഹം. 2004-ൽ രാജ്യം പത്മശ്രീ നൽകി ആദരിച്ച ഇദ്ദേഹം 2019-ൽ ബിസിസിഐ പ്രസിഡന്റായും തിരഞ്ഞെടുക്കപ്പെട്ടു. ഐപിഎൽ സ്പോട്ട് ഫിക്സിംഗ് അടക്കമുള്ള കേസുകൾ അന്വേഷിക്കാൻ സുപ്രീം കോടതി നിയമിച്ച സമിതിയിലും അദ്ദേഹം അംഗമായിരുന്നു. പ്രശസ്ത ക്ലാസിക്കൽ നർത്തകി ഡോണ ഗാംഗുലിയെയാണ് അദ്ദേഹം വിവാഹം കഴിച്ചത്. സന ഗാംഗുലി ഏക മകളാണ്. 2008-ൽ അന്താരാഷ്ട്ര ക്രിക്കറ്റിൽ നിന്നും 2012-ൽ എല്ലാത്തരം ക്രിക്കറ്റിൽ നിന്നും അദ്ദേഹം വിരമിച്ചു.