ഒമാനിൽ നിന്നുള്ള അന്താരാഷ്ട്ര വിമാന സർവീസുകൾ ചൊവ്വാഴ്ച മുതൽ പുനഃരാരംഭിക്കും

മസ്ക്കറ്റ്​: അന്താരാഷ്​ട്ര വിമാന സര്‍വീസുകള്‍ക്ക്​ ഒമാന്‍ ഏര്‍പ്പെടുത്തിയിരുന്ന താല്‍ക്കാലിക വിലക്ക്​ ചൊവ്വാഴ്​ച മുതൽ പിൻവലിക്കും. കര, കടല്‍ അതിര്‍ത്തികളും തുറക്കാന്‍ ഞായറാഴ്​ച നടന്ന സുപ്രീം കമ്മിറ്റി യോഗം തീരുമാനിച്ചു. ചൊവ്വാഴ്​ച പുലര്‍ച്ചെ ഒരു മണി മുതലാണ്​ അതിര്‍ത്തികള്‍ തുറക്കുക.

ജനിതകമാറ്റം വന്ന കൊറോണ വൈറസ് ബ്രിട്ടൻ ഉൾപ്പടെ യൂറോപ്പിൽ വ്യാപിച്ചതോടെയാണ് ഒരാഴ്ചത്തേക്കു ഒമാൻ അതിർത്തികൾ അടച്ചത്. ഒമാനിലേക്ക്​ മറ്റ്​ രാജ്യങ്ങളില്‍ നിന്ന്​ വരുന്ന യാത്രക്കാര്‍ക്ക്​ യാത്രക്ക്​ മുമ്ബ്​ പി.സി.ആര്‍ പരിശോധന വേണമെന്ന നിബന്ധന പുനസ്​ഥാപിച്ചിട്ടുമുണ്ട്​. അത്യാവശ്യമില്ലാത്ത യാത്രകള്‍ ഒഴിവാക്കണമെന്നും ജനങ്ങള്‍ ആരോഗ്യ, സുരക്ഷാ മുന്‍ കരുതല്‍ നടപടികള്‍ പാലിക്കണമെന്നും സുപ്രീം കമ്മിറ്റി നിര്‍ദേശിച്ചു.

ഒരാഴ്ചത്തെ സ്ഥിതിഗതികൾ വിലയിരുത്തിയശേഷം തുടർ നടപടികൾ സ്വീകരിക്കാമെന്നാണ് വിലക്ക് ഏർപ്പെടുത്താൻ തീരുമാനിച്ച സുപ്രീം കമ്മിറ്റി യോഗം നിലപാടെടുത്തത്. ഒരാഴ്ച ഏർപ്പെടുത്തിയ വിലക്ക് ഫലപ്രദമാണെന്നാണ് ഇപ്പോൾ വിലയിരുത്തിയിരിക്കുന്നത്.

സൗദിയില്‍ തിങ്കളാഴ്ച മുതൽ അന്താരാഷ്ട്ര വിമാന സര്‍വീസുകള്‍ക്ക് വിലക്ക് ഏര്‍പ്പെടുത്തിയിരുന്നു. കര അതിര്‍ത്തികളും തുറമുഖങ്ങളും അടച്ചിട്ടുണ്ട്. ഒരാഴ്ചക്കാലത്തേക്കാണ് നിയന്ത്രണങ്ങള്‍ ഏർപ്പെടുത്തിയത്. കൊറോണ വൈറസിന്റെ പുതിയ വകഭേദം ബ്രിട്ടനിൽ അതിവേഗം പടരുന്ന സാഹചര്യം കൂടി കണക്കിലെടുത്താണ് പുതിയ തീരുമാനം.