സ്‌കൂൾ കുട്ടികളോടൊപ്പം രക്ഷാബന്ധൻ ആഘോഷിച്ച് പ്രധാനമന്ത്രി നരേന്ദ്രമോദി; വൈറലായി ചിത്രങ്ങൾ

കുട്ടികളോടൊപ്പം രക്ഷാബന്ധൻ ആഘോഷിച്ച് പ്രധാനമന്ത്രി നരേന്ദ്രമോദി.

ഇപ്പോൾ കുട്ടികൾക്കൊപ്പം അദേഹം രക്ഷാബന്ധൻ ആഘോഷിക്കുന്ന ചിത്രങ്ങളാണ് സോഷ്യൽമീഡിയയിൽ തരംഗമാകുന്നത്.

പ്രധാനമന്ത്രിയുടെ ഔദ്യോഗിക ഫേസ്ബുക്ക്, ട്വിറ്റർ പേജുകളിലൂടെ പങ്കുവെച്ച ചിത്രങ്ങളാണ് വൈറലായത്.

 പ്രധാനമന്ത്രി ഡൽഹിയിലെ ഒരു സ്‌കൂളിൽ വിദ്യാർത്ഥികൾക്കൊപ്പം രക്ഷാബന്ധൻ ആഘോഷിക്കുന്നതിന്റെ ചിത്രങ്ങളാണിത്.

കുഞ്ഞുങ്ങൾ പ്രധാനമന്ത്രിയുടെ കയ്യിൽ രക്ഷാബന്ധൻ കെട്ടുന്നതും ചിലർ പ്രധാനമന്ത്രിയ്‌ക്ക് രക്ഷാബന്ധനത്തിനോടൊപ്പം സ്‌നേഹാദരമായി മുത്തം കൊടുക്കുന്നതും ചിത്രങ്ങളിൽ കാണാം.

ചന്ദ്രയാൻ -3 ദൗത്യത്തിന്റെ സമീപകാല വിജയത്തെക്കുറിച്ച് കുട്ടികൾ സംസാരിക്കുകയും വരാനിരിക്കുന്ന ആദിത്യ എൽ -1 ദൗത്യത്തെക്കുറിച്ചുള്ള ആവേശം പ്രകടിപ്പിക്കുകയും ചെയ്തു.

വിദ്യാർത്ഥികൾ കവിതകൾ ചൊല്ലുകയും ഗാനങ്ങൾ ആലപിക്കുകയും ചെയ്തു.

നേരത്തെ പ്രധാനമന്ത്രി രക്ഷാബന്ധൻ ദിനത്തിൽ ജനങ്ങൾക്ക് ആശംസകൾ നേർന്നിരുന്നു.

സഹോദരി-സഹോദരന്മാർ തമ്മിലുള്ള അഭേദ്യമായ വിശ്വാസവും സ്നേഹവും ചൂണ്ടികാട്ടുന്ന ഈ മഹത്തായ ഉത്സവം നമ്മുടെ സംസ്‌കാരത്തിന്റെ പവിത്രമായ പ്രതിഫലനമാണെന്നും അത് ജനങ്ങളുടെ ജീവിതത്തിൽ സ്നേഹത്തിന്റെയും സൗഹാർദത്തിന്റെയും വികാരങ്ങൾ ശക്തിപ്പെടുത്തട്ടെയെന്നും അദ്ദേഹം ട്വിറ്ററിൽ കുറിച്ചു.

വിദ്യാർത്ഥികളുമായി ഏറെ നേരം സംവദിച്ചതിനു ശേഷമാണ് പ്രധാനമന്ത്രി സ്‌കൂളിൽ നിന്നും മടങ്ങിയത്.

രാജ്യത്തുടനീളം രക്ഷാബന്ധന്‍ ആഘോഷിക്കുകയാണ്.

സഹോദരീസഹോദരന്മാര്‍ ഒത്തുചേരുന്ന ചടങ്ങാണ് ഇതിന്റെ പ്രത്യേകത.

ഈ ദിവസം സഹോദരിമാര്‍ അവരുടെ സഹോദരന്റെ കൈകളില്‍ രാഖി കെട്ടി കൊടുക്കുന്നത് ദീര്‍ഘവും സമൃദ്ധവുമായ ജീവിതത്തിന് നല്ലതാണ് എന്നാണ് വിശ്വാസം.