സച്ചിന്റെ സുരക്ഷ വെട്ടിക്കുറച്ചു; ശിവസേനാ തലവന്റെ മകൻ ആദിത്യ താക്കറെക്ക് 'Z'കാറ്റഗറി സുരക്ഷ

മുംബൈ: ക്രിക്കറ്റ് ഇതിഹാസം സച്ചിൻ തെൻഡുൽക്കറുടെ സുരക്ഷ വെട്ടിക്കുറച്ച് മഹാരാഷ്ട്രയിലെ ഉദ്ധവ് താക്കറെ സർക്കാർ. പകരം ശിവസേന എം‌എൽ‌എ ആദിത്യ താക്കറെയുടെ സുരക്ഷ വർധിപ്പിച്ചു. മഹാരാഷ്ട്ര സർക്കാർ നിയോഗിച്ച കമ്മിറ്റിയുടെ അവലോകനത്തിനു ശേഷമാണ് തീരുമാനം. സച്ചിൻ, ആദിത്യ താക്കറെ എന്നിവരെ കൂടാതെ 90 ലധികം പ്രമുഖരുടെ സുരക്ഷാ പരിരക്ഷയും യോഗത്തിൽ അവലോകനം ചെയ്തതായി അധികൃതർ അറിയിച്ചു.

ഭാരതരത്‌ന അവാർഡ് ജേതാവായ സച്ചിന് ഇതുവരെ ‘X’ കാറ്റഗറി സുരക്ഷയായിരുന്നു നൽകിവന്നത്. സുരക്ഷ വെട്ടിക്കുറച്ചതോടെ 24 മണിക്കൂർ ഉണ്ടായിരുന്ന പൊലീസുകാരന്റെ സേവനം ഇനി ഉണ്ടാകില്ല. എന്നാൽ രാജ്യസഭയിലെ മുൻ അംഗം എന്ന നിലയിൽ പുറത്തു പോകുമ്പോഴുള്ള പൊലീസ് അകമ്പടി തുടരും. മുഖ്യമന്ത്രി ഉദ്ധവ് താക്കറെയുടെ മകൻ കൂടിയായ ആദിത്യ താക്കറെയുടെ സുരക്ഷ 'Z' വിഭാഗത്തിലേക്ക് ഉയർത്തി. നേരത്തെ അദ്ദേഹത്തിന് ലഭിച്ചിരുന്നത് ‘വൈ പ്ലസ്’ സുരക്ഷയായിരുന്നു.

എൻ‌സി‌പി അധ്യക്ഷൻ ശരത് പവാറിന്റെയും അനന്തരവനും പാർട്ടി നേതാവുമായ അജിത് പവാറിന്റെയും സെഡ് പ്ലസ് സുരക്ഷ തുടരും. സാമൂഹ്യ പ്രവർത്തകൻ അണ്ണാ ഹസാരെയുടെ സുരക്ഷ വൈ പ്ലസിൽ നിന്ന് സെഡ് വിഭാഗത്തിലേക്ക് ഉയർത്തി. മുൻ ഉത്തർപ്രദേശ് ഗവർണർ റാം നായിക്കിന്റെ സെഡ് പ്ലസ് സുരക്ഷ എക്സ് ആയി താഴ്ത്തി.

മുൻ ബിജെപി മന്ത്രിമാരായ ഏക്നാഥ് ഖഡ്സെ, രാം ഷിൻഡെ എന്നിവരുടെ സുരക്ഷയും കുറച്ചു. മുംബൈ ഭീകരാക്രമണ കേസുകൾ ഉൾപ്പെടെ പ്രധാന കേസുകളിൽ‌ കോടതിയിൽ ഹാജരായ അഭിഭാഷകൻ ഉജ്ജ്വൽ നികമിന്റെ സുരക്ഷയും വെട്ടിക്കുറച്ചു.‌