Covid 19 | ഇന്ന് 39 പേർക്ക് കോവിഡ് 19 സ്ഥിരീകരിച്ചു; കാസർകോട്ട് 34; ആകെ രോഗബാധിതർ 164

കാസർകോട്: സംസ്ഥാനത്ത് ഇന്ന് സ്ഥിരീകരിച്ച 39 കേസുകളിൽ 34 എണ്ണവും കാസർകോട്ട്. ഇതോടെ കാസർകോട്ട് രോഗം സ്ഥിരീകരിച്ചവരുടെ എണ്ണം 81 ആയി.

കാസർകോട്ട് കോവിഡ് 19 രോഗികളെ ചികിത്സിക്കാൻ കൂടുതൽ സൌകര്യങ്ങൾ ഒരുക്കുമെന്ന് മുഖ്യമന്ത്രി പറഞ്ഞു. മെഡിക്കൽ കോളേജ് കെട്ടിടം, കേന്ദ്ര സർവ്വകലാശാല എന്നിവിടങ്ങളിലും ഐസൊലേഷൻ വാർഡ് ഒരുക്കുമെന്ന് മുഖ്യമന്ത്രി പറഞ്ഞു.

കാസർകോട്ടെ 34 എണ്ണത്തിന് പുറമെ കണ്ണൂരിൽ രണ്ടുപേർക്കും തൃശൂർ, കോഴിക്കോട്, കൊല്ലം എന്നിവിടങ്ങളിൽ ഓരോരുത്തർക്കും രോഗം സ്ഥിരീകരിച്ചു.

സംസ്ഥാനത്ത് ആകെ 1,10,299 പേരാണ് നിരീക്ഷണത്തിലുള്ളത്. 616 പേര്‍ ആശുപത്രികളിലാണ് നിരീക്ഷണത്തിലുള്ളത്. 1,09,683 പേര്‍ വീടുകളിലും നിരീക്ഷണത്തില്‍ കഴിയുന്നുണ്ട്.

5679 സാംപിളുകൾ പരിശോധനയ്ക്ക് അയച്ചതിൽ 4448 എണ്ണം നെഗറ്റീവാണെന്ന് സ്ഥിരീകരിച്ചു.

ആദ്യമായാണ് കേരളത്തിൽ ഇത്രയും പോസിറ്റീവ് കേസുകള്‍ ഒരുമിച്ച് റിപ്പോര്‍ട്ട് ചെയ്യപ്പെടുന്നത്. ഇതോടെ സംസ്ഥാനത്ത് ആകെ ചികിത്സയിലുള്ളത് 164 പേരാണ്.

ഇന്ന് 112 പേരെ ആശുപത്രിയില്‍ പ്രവേശിപ്പിച്ചിട്ടുണ്ട്.

സ്ഥിതിഗതി കൂടുതല്‍ ഗൗരവമായി തിരിച്ചറിയണമെന്നും നിയന്ത്രണങ്ങള്‍ കര്‍ശനമായി തുടരുമെന്നും മുഖ്യമന്ത്രി അറിയിച്ചു.