CPM- BJP Clash in Kannur| കണ്ണൂരിൽ എട്ടു പേർക്ക് പരിക്കേറ്റ അക്രമത്തിനു കാരണം ഷെഡ് കെട്ടുന്നതിന്റെ തർക്കം

കണ്ണൂർ: ന്യൂമാഹിയിൽ സിപിഎം- ബിജെപി പ്രവർത്തകർ തമ്മിലുണ്ടായ സംഘർഷത്തിൽ എട്ടുപേർക്ക് പരിക്കേറ്റു. മുന്ന് സി പി എം പ്രവർത്തകർക്കും അഞ്ച് ബി ജെ പി പ്രവർത്തകർക്കുമാണ് പരിക്ക്. ഇന്നലെ രാത്രിയാണ് അഴീക്കലിൽ അക്രമം ഉണ്ടായത്.

തലക്ക് ഗുരുതരമായി പരിക്കേറ്റ സി പി എം പ്രവർത്തകരായ ശ്രീഖിൽ, ശ്രീജിത്ത്, അജിത്ത് എന്നിവരെ തലശ്ശേരി സഹകരണ ആശുപത്രി എമർജൻസി ഡിപ്പാർട്ട്മെന്റിൽ പ്രവേശിപ്പിച്ചു. ന്യൂ മാഹി പഞ്ചായത്തംഗം ശ്രീദേവിയുടെ മകനാണ് പരിക്കേറ്റ നിഖിൽ .

അഴീക്കലിലെ സി.പി.എം. ബ്രാഞ്ച് കമ്മിറ്റി ഓഫീസായ പാട്യം ഗോപാലൻ സ്മാരക മന്ദിരത്തിനുനേരേയും ആക്രമണമുണ്ടായതായി പരാതിയുണ്ട്.

ബിജെപി പ്രവർത്തകരായ അഖിൽ, ലിനീഷ്, ലിജിൻ എന്നിവരാണ് ആക്രമിക്കപ്പെട്ടത്. പഞ്ചായത്ത് കമ്മറ്റി അംഗമാണ് ലിനീഷ്. ഇവരെ തലശ്ശേരിയിലെ സ്വകാര്യ ആശുപത്രിയിൽ പ്രവേശിപ്പിച്ചു.

അഖിലിന്റെ ബൈക്കും ലിനീഷിന്റെ ഓട്ടോറിക്ഷയും തകർത്തു. ഇതുകൂടാതെ പ്രദേശത്തെ ബിജെപി പ്രവർത്തകനായ പ്രസാദിന്റെ വീടിന് നേരെയും അക്രമം നടന്നിട്ടുണ്ട്. പ്രസാദിനും ഭാര്യ ജിനക്കും പരിക്കേറ്റിട്ടുണ്ട്.

കടലോരത്ത് ഷെഡ് കെട്ടുന്നതുമായി ഉള്ള തർക്കമാണ് സംഘർഷത്തിൽ കലാശിച്ചത്. പ്രദേശത്ത് വൻ പോലീസ് സന്നാഹം ക്യാമ്പ് ചെയ്തിട്ടുണ്ട്. പ്രതികൾക്കായുള്ള തെരച്ചിൽ ആരംഭിച്ചിട്ടുണ്ട്.