EPFO 3.0 Updates 2025: പിഎഫ് ഭാഗികമായി പിൻവലിക്കൽ; 11 വലിയ മാറ്റങ്ങളെകുറിച്ച് അറിയാം

EPFO 3.0 പരിഷ്കരണത്തിന്റെ ഭാഗമായി എംപ്ലോയീസ് പ്രൊവിഡന്റ് ഫണ്ട് ഓർഗനൈസേഷൻ (EPFO) ഭാഗിക പിൻവലിക്കൽ നിയമങ്ങളിൽ (Partial Withdrawal Rules) മാറ്റങ്ങൾ വരുത്തിയിട്ടുണ്ട്. ഒക്ടോബർ 13ന് ലേബർ മിനിസ്റ്റർ മൻസുഖ് മാണ്ഡവ്യയുടെ അധ്യക്ഷതയിൽ ചേർന്ന സെൻട്രൽ ബോർഡ് ഓഫ് ട്രസ്റ്റീസ് യോഗത്തിലാണ് ഈ തീരുമാനമെടുത്തത്.

തൊഴിലില്ലായ്മ - പഴയ നിയമം അനുസരിച്ച് ഒരു മാസത്തെ തൊഴിലില്ലായ്മയ്ക്ക് ശേഷം 75% ബാലൻസും, രണ്ട് മാസത്തിന് ശേഷം ബാക്കി 25%-ഉം പിൻവലിക്കാമായിരുന്നു. എന്നാല്‍ നിയമം അനുസരിച്ച് തൊഴിൽ നഷ്ടപ്പെട്ടാലുടൻ 75% തുക പിൻവലിക്കാം. എന്നാൽ പൂർണ്ണമായ തുക പിൻവലിക്കാൻ 12 മാസം വരെ കാത്തിരിക്കണം.

‍പെൻഷൻ പിൻവലിക്കൽ- മുൻപ് രണ്ട് മാസത്തെ തൊഴിലില്ലായ്മയ്ക്ക് ശേഷം പെൻഷൻ തുക പിൻവലിക്കാമായിരുന്നു. പുതിയ പരിഷ്കരണത്തിൽ പെൻഷൻ തുക പിൻവലിക്കാനുള്ള കാത്തിരിപ്പ് കാലാവധി 36 മാസമായി വർധിപ്പിച്ചു.

സ്ഥാപനം അടച്ചുപൂട്ടുകയോ ലോക്കൗട്ടോ ഉണ്ടായാൽ- നേരത്തെ ജീവനക്കാരന്റെ വിഹിതമോ അല്ലെങ്കിൽ മൊത്തം തുകയുടെ 100 ശതമാനമോ പിൻവലിക്കാമായിരുന്നു. പുതിയ നിയമപ്രകാരം മൊത്തം തുകയുടെ 75% പിൻവലിക്കാം. ബാക്കി 25% മിനിമം ബാലൻസായി നിലനിർത്തണം.

പകർച്ചവ്യാധി- മുൻപ് മൂന്ന് മാസത്തെ അടിസ്ഥാന ശമ്പളവും ക്ഷാമബത്തയും (BW + DA) അല്ലെങ്കിൽ ബാലൻസിന്റെ 75%, ഇതിൽ ഏതാണോ കുറവ് അത് പിൻവലിക്കാം. ഇപ്പോൾ ഇതേ വ്യവസ്ഥകൾ തുടരുന്നുണ്ടെങ്കിലും, പുതിയ സ്റ്റാൻഡേർഡ് സർവീസ് നിബന്ധനകളുമായി ഇതിനെ യോജിപ്പിച്ചിട്ടുണ്ട്.

പ്രകൃതിക്ഷോഭം- മുൻപ് 5,000 രൂപയോ അല്ലെങ്കിൽ പലിശ സഹിതം സ്വന്തം വിഹിതത്തിന്റെ 50 ശതമാനമോ പിൻവലിക്കാം. പുതിയ നിയമം അനുസരിച്ച് ഭാഗികമായ എല്ലാ പിൻവലിക്കലുകൾക്കും കുറഞ്ഞത് 12 മാസത്തെ സർവീസ് കാലാവധി നിർബന്ധമാക്കി.

ചികിത്സാ ആവശ്യങ്ങൾക്ക്- പഴയ നിയമപ്രകാരം സ്വന്തം ആവശ്യത്തിനോ കുടുംബാംഗങ്ങളുടെ ആവശ്യത്തിനോ ആയി 6 മാസത്തെ അടിസ്ഥാന ശമ്പളവും ഡിഎയും അല്ലെങ്കിൽ ജീവനക്കാരന്റെ വിഹിതമോ പിൻവലിക്കാം. ഒന്നിലധികം തവണ ഇത് സാധ്യമായിരുന്നു. പുതിയ നിയത്തിലും അതേ ഘടന തുടരുന്നുവെങ്കിലും കുറഞ്ഞത് 12 മാസത്തെ സർവീസ് കാലാവധി പൂർത്തിയാക്കിയിരിക്കണം.

വിദ്യാഭ്യാസം, വിവാഹം- നേരത്തെ 7 വർഷത്തെ അംഗത്വത്തിന് ശേഷം സ്വന്തം വിഹിതത്തിന്റെ 50% പിൻവലിക്കാമായിരുന്നു. വിദ്യാഭ്യാസത്തിന് 3 തവണയും വിവാഹത്തിന് 2 തവണയും മാത്രം. പുതിയ നിയമത്തിൽ പിൻവലിക്കാവുന്ന തവണകളുടെ എണ്ണം വർധിപ്പിച്ചു. വിദ്യാഭ്യാസത്തിനായി 10 തവണയും വിവാഹ ആവശ്യങ്ങൾക്കായി 5 തവണയും തുക പിൻവലിക്കാം.

വീട് വാങ്ങൽ അല്ലെങ്കിൽ നിർമാണം- നേരത്തെ 24-36 മാസത്തെ സർവീസിന് ശേഷം അനുവദിച്ചിരുന്നു. ഇത് ഒരു തവണ മാത്രമേ സാധ്യമായിരുന്നുള്ളൂ. ഇപ്പോൾ എല്ലാത്തരം ഭാഗിക പിൻവലിക്കലുകൾക്കും 12 മാസത്തെ സർവീസ് കാലാവധി എന്ന ഏകീകൃത നിയമം ബാധകമാക്കി.

വീട് പുതുക്കിപ്പണിയൽ- 12 മാസത്തെ അടിസ്ഥാന ശമ്പളവും ഡിഎയും അല്ലെങ്കിൽ സ്വന്തം വിഹിതമോ പിൻവലിക്കാമായിരുന്ന പഴയ വ്യവസ്ഥകൾ തന്നെ തുടരുന്നു.

ഭവന വായ്പാ തിരിച്ചടവ്- പഴയ നിയമപ്രകാരം 36 മാസത്തെ അടിസ്ഥാന ശമ്പളവും ഡിഎയും അല്ലെങ്കിൽ മൊത്തം ബാലൻസ് തുകയോ പിൻവലിക്കാം. സർവീസ് കാലയളവിൽ ഒരു തവണ മാത്രമായിരുന്നു ഇത്. എന്നാൽ പുതിയ നിയമപ്രകാരം പഴയ മാനദണ്ഡങ്ങൾ തുടരുന്നുണ്ടെങ്കിലും, ഡിജിറ്റൽ അപേക്ഷാ നടപടികൾ ലളിതമാക്കി.

വീട് അല്ലെങ്കിൽ ഫ്ലാറ്റ് വാങ്ങൽ- പലിശ സഹിതമുള്ള ആകെ വിഹിതത്തിന്റെ 90% വരെയോ അല്ലെങ്കിൽ വീട് വാങ്ങുന്നതിനുള്ള ചിലവോ (ഇതിൽ ഏതാണോ കുറവ്) ഒരു തവണ പിൻവലിക്കാമായിരുന്നു. പുതിയ പരിഷ്കാരത്തിലും ഇതേ വ്യവസ്ഥകൾ തന്നെ തുടരുന്നു. എന്നാൽ ഡിജിറ്റൽ പ്രോസസിംഗ് വരുന്നതോടെ ഈ ഇടപാടുകൾ കൂടുതൽ സുഗമമാകുമെന്ന് പ്രതീക്ഷിക്കുന്നു.