Onam 2020 | ബെവ്കോ മാത്രമല്ല തിരുവോണ ദിനം ബാറുകളും തുറക്കില്ല; സംസ്ഥാനത്ത് മൂന്നുദിവസം മദ്യവിൽപ്പനയില്ല

തിരുവനന്തപുരം: സംസ്ഥാനത്ത് തിരുവോണ ദിനത്തിൽ ബാറുകളിലൂടെയുള്ള മദ്യവിൽപ്പന തടഞ്ഞ് സർക്കാർ ഉത്തരവിറക്കി.

നേരത്തെ ബെവ്‌കോ, കൺസ്യൂമർഫെഡ് ഔട്ട് ലെറ്റുകൾക്ക് മാത്രമാണ് തിരുവോണ ദിനമായ 31-ന് അവധി നൽകിയിരുന്നത്. ഇതിനു പിന്നാലെയാണ് ബാറുകളിലും മദ്യവിൽപ്പന തടഞ്ഞ് സർക്കാർ ഉത്തരവിറക്കിയത്.

കഴിഞ്ഞവർഷംമുതലാണ് തിരുവോണദിവസം സർക്കാർ ബെവ്‌കോ, കൺസ്യൂമർഫെഡ് ഔട്ട് ലെറ്റുകൾക്ക് അവധി നൽകിത്തുടങ്ങിയത്. കഴിഞ്ഞ വർഷം ബെവ്‌കോ, കൺസ്യൂമർഫെഡ് ഔട്ട് ലെറ്റുകൾ മാത്രം അടച്ചിട്ട് ബാറുകൾ തുറക്കാൻ അനുവദിച്ചത് വൻ വിമർശനത്തിനിടയാക്കിയിരുന്നു.

ബാറുകൾക്ക് ഓണക്കച്ചവടം നടത്താൻ വേണ്ടിയാണ് ബിവറേജസ് അടച്ചതെന്നായിരുന്നു വിമർശനം.

കോവിഡ് പശ്ചാത്തലത്തിൽ ബാറുകൾമാത്രം തുറന്നാൽ തിരക്കുണ്ടാകാനുള്ള സാധ്യത കണക്കിലെടുത്താണ് മദ്യവിൽപ്പന തടഞ്ഞത്.

ഇതോടെ ഞായറാഴ്ച കഴിഞ്ഞാൽ വ്യാഴാഴ്ച മാത്രമായിരിക്കും മദ്യശാലകൾ തുറക്കുക.

തിങ്കളാഴ്ച തിരുവോണം അവധി. സെപ്റ്റംബർ ഒന്നായ ചൊവ്വാഴ്ച ഡ്രൈ ഡേയാണ്. രണ്ടിന് ശ്രീനാരായണഗുരു ജയന്തി പ്രമാണിച്ച് മദ്യവിൽപ്പന നിരോധിച്ചിട്ടുണ്ട്.