ഇതുവരെ കണ്ടിട്ടില്ലാത്ത കാമുകിയെ തേടി അർദ്ധരാത്രിയിൽ കാമുകൻ പയ്യന്നൂരിൽ; ഗൂഗിൾ മാപ്പ് ചതിച്ചതോടെ പൊലീസ് പിടിയിലായി

ഗൂഗിൾ മാപ്പ് ഉപയോഗിച്ച് അർദ്ധരാത്രി കാമുകിയുടെ വീട് കണ്ടെത്താനുള്ള ശ്രമത്തിനിടയിൽ യുവാവ് പൊലീസ് പിടിയിലായി. നീലേശ്വരം സ്വദേശിയായ 19 കാരൻ ആണ് ഇതുവരെ നേരിട്ട കണ്ടിട്ടില്ലാത്ത കാമുകിയെ അന്വേഷിച്ച് പയ്യന്നൂരിൽ എത്തിയത്.

ഒളവറ സ്വദേശിയായ പതിനാറുകാരിയുമായി യുവാവ് ഫോൺ വഴിയാണ് പ്രണയത്തിലായത്. പ്രണയം തീവ്രമായ സാഹചര്യത്തിലാണ് കാമുകിയെ കാണാനായി തീരുമാനിച്ചത്. ഗൂഗിൾ മാപ്പ് ഉപയോഗിച്ച് യുവതിയുടെ വീട്ടിൽ രാത്രി എത്താനായിരുന്നു പദ്ധതി.

അർദ്ധരാത്രി പയ്യന്നൂരിൽ കറങ്ങി നടക്കുന്ന യുവാവിനെ കണ്ടപ്പോൾ പൊലീസിന് സംശയം തോന്നി. ചോദ്യങ്ങൾക്ക് കൃത്യമായി ഉത്തരം പറയാൻ യുവാവിന് കഴിയാതായതോടെ സംശയം ബലപ്പെട്ടു. തുടർന്ന് ജീപ്പിൽ കയറ്റി സ്റ്റേഷനിൽ എത്തിച്ചു. അവിടെ വച്ചാണ് യുവാവ് തന്റെ പ്രണയത്തെക്കുറിച്ച് തുറന്നു പറഞ്ഞത്.

യുവാവ് പറഞ്ഞ കഥ ആദ്യം വിശ്വസിക്കാൻ പൊലീസിന് ബുദ്ധിമുട്ടായി തോന്നി. എന്നാൽ രാത്രി 1.45 ആയതോടെ കാമുകിയുടെ ഫോൺ വന്നു. യുവാവിന്റെ ഫോൺ വാങ്ങി പോലീസ് അറ്റൻഡ് ചെയ്തതോടെയാണ് തീവ്ര പ്രണയത്തിന്റെ വാസ്തവം ബോധ്യപ്പെട്ടത്.

കാമുകന്റെ വരവും കാത്തിരിക്കുകയായിരുന്നു പതിനാറുകാരി. തുടർന്ന് ഫോൺ പരിശോധിച്ചപ്പോൾ ഇരുവരും തമ്മിൽ നടത്തിയ സംഭാഷണങ്ങളുടെ വിവരങ്ങളും ലഭിച്ചു.

യുവാവിന്റെ പ്രണയം സത്യമാണെന്ന് വ്യക്തമായതോടെ പൊലീസ് അർദ്ധരാത്രി സംശയാസ്പദമായ രീതിയിൽ കറങ്ങി നടന്നാൽ ഉണ്ടാവുന്ന പ്രശ്നങ്ങളെക്കുറിച്ച് അയാളെ പറഞ്ഞ് ബോധ്യപ്പെടുത്തി. കാര്യമായ ഉപദേശം നൽകിയ ശേഷം 19കാരനെ വിട്ടയച്ചു.