ആർത്തവം കാരണം പെൺകുട്ടികൾക്കിനി ക്ലാസ് മുടങ്ങില്ല; പുതിയ പരിഹാരം

ആർത്തവം കാരണം പെൺകുട്ടികൾക്ക് സ്കൂളിൽ പോകാൻ കഴിയാത്ത സാഹചര്യം ഇനി ഉണ്ടാകില്ല. പുതിയ പരിഹാരവുമായി എത്തിയിരിക്കുകയാണ് യുകെ സർക്കാർ. ആർത്തവ ശുചിത്വ ഉത്പ്പന്നങ്ങൾ സ്കൂളുകൾ വഴി സൗജന്യമായി വിതരണം ചെയ്യാനാണ് യുകെ സർക്കാരിന്റെ തീരുമാനം.

യുകെ സർക്കാരിന്റെ പുതിയ പദ്ധതിയനുസരിച്ച് സർക്കാർ സ്കൂളുകൾക്കും കോളജുകൾക്കും ആർത്തവ ശുചിത്വ ഉത്പ്പന്നങ്ങൾ ഓഡർ ചെയ്ത് അവ പെൺകുട്ടികൾക്ക് സൗജന്യമായി വിതരണം ചെയ്യാം.

ആർത്തവ ശുചിത്വ ഉത്പ്പന്നങ്ങളുടെ അഭാവം മൂലം പെൺകുട്ടികൾ സ്കൂളിലേക്ക് വരാതിരിക്കുന്നതിനുള്ള സാഹചര്യം ഒഴിവാക്കാനാണ് ഇത്തരത്തിലൊരു പദ്ധതി കൊണ്ടു വന്നിട്ടുള്ളത്.

ബിബിസി റിപ്പോർട്ട് ചെയ്യുന്നതനുസരിച്ച് സർക്കാർ സ്കൂളുകൾക്കും കോളജുകൾക്കും ഇത്തരം ഉത്പ്പന്നങ്ങൾ ഓൺലൈൻ സ്റ്റോർ വഴിയോ ഇമെയിൽ വഴിയോ ഫോൺ വഴിയോ ഓഡർ ചെയ്യാവുന്നതാണ്.

മൂന്ന് വർഷം നീണ്ട പ്രചരണത്തിന് പിന്നാലെയാണ് സർക്കാർ ഇത്തരത്തിലൊരു പദ്ധതി കൊണ്ടു വന്നിട്ടുള്ളത്. പെൺകുട്ടികൾക്ക് സ്കൂളിൽ ആർത്തവ ആരോഗ്യ പരിഹാരങ്ങൾ നൽകാതിരിക്കുന്നത് വിദ്യാർത്ഥിക്കും സ്കൂളിന്റെ ലിംഗാനുപാതത്തിനും ഹാനികരമാണെന്ന് പദ്ധതിക്കായി പ്രചാരണം നടത്തിയവർ പറയുന്നു.

അമിക ജോർജ് എന്ന ഇരുപതുകാരിയാണ് പ്രചാരണത്തിന് നേതൃത്വം നൽകിയത്. സ്കൂളുകളില്‍ ആർത്തവ ആരോഗ്യം, ശുചിത്വം, വിലക്ക് എന്നിവയെക്കുറിച്ചുള്ള ചർച്ച പ്രോത്സാഹിപ്പിക്കുന്നതിലൂടെ ആർത്തവത്തെ തരംതാഴ്ത്തുകയെന്നതായിരുന്നു അവരുടെ ലക്ഷ്യം.

പ്രചാരണത്തെത്തുടർന്ന്, സെക്കൻഡറി സ്കൂൾ വിദ്യാർത്ഥികൾക്ക് ആർത്തവ ഉൽ‌പന്നങ്ങൾ ലഭ്യമാക്കാനുള്ള പദ്ധതി യുകെ സർക്കാർ കഴിഞ്ഞ മാർച്ചിൽ പ്രഖ്യാപിച്ചിരുന്നു.പുതിയ പദ്ധതി പ്രകാരം, സാനിറ്ററി നാപ്കിൻ, കപ്പുകൾ എന്നിവയുൾപ്പെടെ നിരവധി സാനിറ്ററി ഉൽപ്പന്നങ്ങൾ സ്കൂളുകൾക്ക് ലഭ്യമാക്കും.