Women's Day 2020 | ഞായറാഴ്ച വേണാട് എക്സ്പ്രസ് ചരിത്രംകുറിക്കും; കേരളത്തിൽ ആദ്യമായി പൂർണമായും സ്ത്രീകൾ ഓടിക്കുന്ന ട്രെയിൻ

തിരുവനന്തപുരം: 2020 മാർച്ച് എട്ട് ഞായറാഴ്ച രാവിലെ 10.15ന് എറണാകുളത്തുനിന്ന് ഷൊർണൂരിലേക്ക് പുറപ്പെടുന്ന വേണാട് എക്സ്പ്രസ് ചരിത്രമെഴുതും. കേരളത്തിൽ ആദ്യമായി പൂർണമായും സ്ത്രീകൾ നിയന്ത്രിക്കുന്ന ട്രെയിൻ എന്ന ഖ്യാതി സ്വന്തമാക്കാനൊരുങ്ങുകയാണ് വേണാട് എക്സ്പ്രസ്. അന്താരാഷ്ട്ര വനിതാദിനത്തിന്‍റെ ഭാഗമായാണ് വേണാട് എക്സ്പ്രസ് നിയന്ത്രണം പൂർണമായും സ്ത്രീകൾക്ക് ലഭിക്കുന്നതെന്ന് മന്ത്രി കെ.കെ ശൈലജ വാർത്താകുറിപ്പിൽ വ്യക്തമാക്കി.

അന്നേ ദിവസം വേണാട് എക്സ്പ്രസിന്‍റെ ലോക്കോ പൈലറ്റ്, അസിസ്റ്റന്‍റ് ലോക്കോ പൈലറ്റ്, ഗാർഡ് തുടങ്ങിയ സുപ്രധാന ജോലികളെല്ലാം സ്ത്രീകളായിരിക്കും നിർവ്വഹിക്കുക.

കൂടാതെ ട്രെയിനിൽ സുരക്ഷയൊരുക്കാൻ എത്തുന്നതും റെയിൽവേ സംരക്ഷണ സേനയിലെ വനിതാ ഉദ്യോഗസ്ഥരായിരിക്കും.

ടി.പി ഗൊരാത്തി ഈ ട്രെയിനിന്‍റെ ലോക്കോ പൈലറ്റും വിദ്യാദാസ് അസിസ്റ്റന്‍റ് ലോക്കോ പൈലറ്റും ആയിരിക്കും. ഗാർഡായി എം. ഷീജ, ടിടിഇ ആയി ഗീതാകുമാർ, പ്ലാറ്റ്ഫോം എസ്.എം ആയി ദിവ്യ, കാബിൻ എസ്.എം ആയി നീതു പോയിന്‍റ്സ്മെൻ ആയി പ്രസീദ, രജനി, മെക്കാനിക്കൽ സ്റ്റാഫ് ആയി സിന്ധു വിശ്വനാഥൻ, വി. ആർ വീണ, എ.കെ ജയലക്ഷ്മി, സൂര്യ കമലാസനൻ, ടി.കെ വിനീത, ശാലിനി രാജു, അർച്ചന എന്നിവരാകും ജോലികൾ നിർവ്വഹിക്കുക.

ദക്ഷിണറെയിൽവേയിലെ തിരുവനന്തപുരം ഡിവിഷന്‍റെ ആഭിമുഖ്യത്തിലാണ് വനിതാദിനത്തിൽ ചരിത്രംകുറിക്കുന്ന നേട്ടം നടപ്പാക്കാൻ ഒരുങ്ങുന്നത്.

കേരളത്തിൽ പൂർണമായും സ്ത്രീകൾ നിയന്ത്രിക്കുന്ന ആദ്യ ട്രെയിൻ ആകുന്ന വേണാട് എക്സ്പ്രസിനും ജീവനക്കാർക്കും മാർച്ച് എട്ടിന് രാവിലെ റെയിൽവേയുടെ ആഭിമുഖ്യത്തിൽ എറണാകുളം സ്റ്റേഷനിൽ സ്വീകരണം നൽകും.

കഴിഞ്ഞ ദിവസം ബംഗളൂരു-മൈസൂരു രാജ്യറാണി എക്സപ്രസ് പൂർണമായും സ്ത്രീകൾ നിയന്ത്രിച്ച രാജ്യത്തെ ആദ്യ ട്രെയിൻ എന്ന ഖ്യാതി നേടിയത് വലിയ വാർത്തയായിരുന്നു. അതിന് പിന്നാലെയാണ് കേരളത്തിലും ഇത്തരമൊരു ചരിത്രനിമിഷത്തിന് റെയിൽവേ തയ്യാറെടുക്കുന്നത്.