'ദേ.. പിന്നേം'; ഇഷ്ടനമ്പറില്‍ മെഴ്‌സിഡസ് ബെന്‍സ് AMG 45 S മമ്മൂട്ടിയുടെ ഗ്യാരേജില്‍

പുത്തൻ ആഡംബര വാഹനങ്ങൾ വാങ്ങുന്നതിൽ മമ്മൂക്കയെ തോൽപ്പിക്കാൻ ആവില്ല മക്കളെ. ഇപ്പോഴിതാ തന്റെ ഗ്യാരേജില്‍ പുതിയ വാഹനം എത്തിച്ച് മമ്മൂട്ടി. ബെന്‍സ് എ-ക്ലാസ് മോഡലിന്റെ പെര്‍ഫോമെന്‍സ് പതിപ്പായി മെഴ്‌സിഡീസ് എത്തിച്ചിട്ടുള്ള വാഹനമായ എ.എം.ജി. 45 എസ് ആണ് താരം സ്വന്തമാക്കിയിട്ടുള്ളത്.

താൻ പുതിയതായി വാങ്ങിച്ച വാഹനത്തില്‍ വിമാനത്താളവത്തില്‍ എത്തുന്നതിന്റെ വീഡിയോ സാമൂഹിക മാധ്യമങ്ങളില്‍ വൈറലാണ്. എന്നാൽ ഇ‌ഷ്ട വാഹനം സ്വന്തമാക്കിയപ്പോൾ ഇഷ്ടനമ്പറായ 369 സ്വന്തമാക്കുന്ന കാര്യത്തിൽ താരം ഒരു വിട്ടുവീഴ്ചയ്ക്കും നിന്നില്ല.

കാറുകളോടുള്ള ഇഷ്ടംപോലെ തന്നെ ഏത് വാഹനം വാങ്ങിയാലും അതിന് 369 എന്ന നമ്പരും മമ്മൂട്ടിക്ക് വേണം. റോഡിൽ 369 എന്ന നമ്പരിൽ ഏതെങ്കിലും ആഡംബര കാർ കണ്ടാൽ ആരാധകരുടെ നോട്ടം, അതിൽ മമ്മൂട്ടിയുണ്ടാകുമോയെന്നാണ്.

പുതിയതായി വാങ്ങിയ മെഴ്സിഡസ് ബെൻസ് കാറിനും ഇതെ നമ്പർ തന്നെയാണ് താരം നേടിയത്. ഇതിനായി 1.31 ലക്ഷം രൂപ ചിലവാക്കിയെന്നാണ് വിവരം.

ഇന്ത്യയില്‍ എത്തിയിട്ടുള്ള ഏറ്റവും ഉയര്‍ന്ന പെര്‍ഫോമെന്‍സ് ഉറപ്പാക്കുന്ന ആഡംബര ഹാച്ച്ബാക്ക് മോഡലാണ് എ.എം.ജി.45 എസ്. 92.50 ലക്ഷം രൂപയാണ് ഈ വാഹനത്തിന്റെ ഇന്ത്യയിലെ എക്‌സ്‌ഷോറൂം വില.

അതേസമയം താരത്തിന്റെ പുതിയ ലുക്കും ആരാധകർ ഏറ്റെടുത്ത് കഴിഞ്ഞു. സോഷ്യല്‍ കണ്ണൂര്‍ സ്ക്വാഡിന്‍റെ പ്രമോഷന്‍ പരിപാടികളുമായി ബന്ധപ്പെട്ട് ദുബായില്‍ ആയിരുന്ന താരം കേരളത്തിലേക്ക് മടങ്ങിയെത്തിയപ്പോഴാണ് മമ്മൂട്ടിയുടെ ലുക്കിലെ മാറ്റം ആരാധകര്‍ ശ്രദ്ധിച്ചത്.

എയര്‍പോര്‍ട്ടില്‍ ഭാര്യ സുല്‍ഫത്തിനൊപ്പം വന്നിറങ്ങുന്ന മമ്മൂക്ക മുടിവെട്ടിയൊതുക്കി ഒരു പുതിയ ലുക്കിലാണ് പ്രത്യക്ഷപ്പെട്ടത്. എന്നാല്‍ മമ്മൂട്ടിയുടെ പുതിയ ലുക്ക് ഏത് സിനിമയ്ക്ക് വേണ്ടിയാണെന്നായിരുന്നു ആരാധകരുടെ സംശയം.