ലോകകപ്പ് നേടിയ ഇന്ത്യൻ വനിതാ ടീമുമായി പ്രധാനമന്ത്രി നരേന്ദ്ര മോദി കൂടിക്കാഴ്ച നടത്തി

പ്രധാനമന്ത്രി നരേന്ദ്ര മോദി ഇന്ന് ലോക് കല്യാൺ മാർഗിലുള്ള തന്റെ ഔദ്യോഗിക വസതിയിൽ വനിതാ ലോകകപ്പ് ജേതാക്കളുമായി കൂടിക്കാഴ്ച നടത്തി

വിജയിച്ച ടീമിനെ പ്രധാനമന്ത്രി അഭിനന്ദിച്ചു. തുടർച്ചയായ മൂന്ന് തോൽവികൾ നേരിടുകയും സോഷ്യൽ മീഡിയയിൽ കടുത്ത ട്രോളുകൾക്ക് ഇരയാകുകയും ചെയ്ത ശേഷമുള്ള അവരുടെ ശ്രദ്ധേയമായ തിരിച്ചുവരവിനെ അദ്ദേഹം പ്രത്യേകം പ്രശംസിച്ചു.

ക്യാപ്റ്റൻ ഹർമൻപ്രീത് കൗർ 2017-ൽ ട്രോഫിയില്ലാതെ പ്രധാനമന്ത്രിയെ കണ്ട കാര്യം ഓർത്തു. ഇപ്പോൾ ട്രോഫിയുമായി അദ്ദേഹത്തെ കാണാൻ കഴിഞ്ഞതിൽ സന്തോഷമുണ്ട്, അതിനാൽ അദ്ദേഹത്തെ കൂടുതൽ തവണ കാണാൻ ആഗ്രഹിക്കുന്നു എന്നും അവർ പറഞ്ഞു.

വൈസ് ക്യാപ്റ്റൻ സ്മൃതി മന്ദാന പ്രധാനമന്ത്രിയെ പ്രശംസിച്ചു. പ്രധാനമന്ത്രി തങ്ങളെ പ്രചോദിപ്പിച്ചിരുന്നുവെന്നും അദ്ദേഹം എല്ലാവർക്കും പ്രചോദനമാണെന്നും സ്മൃതി പറഞ്ഞു. ഇന്ന് പെൺകുട്ടികൾ എല്ലാ മേഖലകളിലും മികച്ച പ്രകടനം കാഴ്ചവയ്ക്കുന്നുണ്ടെന്നും അത് പ്രധാനമന്ത്രി കാരണമാണെന്നും അവർ കൂട്ടിച്ചേർത്തു.

പ്രധാനമന്ത്രിയെ കാണാൻ താൻ ആകാംഷയോടെ കാത്തിരിക്കുകയായിരുന്നുവെന്ന് ദീപ്തി ശർമ്മ പറഞ്ഞു. 2017-ൽ നടന്ന കൂടിക്കാഴ്ചയും കഠിനാധ്വാനം തുടരാൻ പ്രധാനമന്ത്രി ആവശ്യപ്പെട്ട കാര്യവും അവർ ഓർത്തെടുത്തു, അപ്പോൾ സ്വപ്‌നം സാക്ഷാത്കരിക്കാൻ കഴിയുമെന്നും അദ്ദേഹം പറഞ്ഞിരുന്നു.

ഹനുമാൻ ടാറ്റൂ ചെയ്തതിനെക്കുറിച്ചും ഇൻസ്റ്റാഗ്രാം അക്കൗണ്ടിൽ 'ജയ് ശ്രീ റാം' എന്ന് കുറിച്ചതിനെക്കുറിച്ചും ദീപ്തി ശർമ്മയുമായി പ്രധാനമന്ത്രി സംസാരിച്ചു.

2021-ൽ ഇംഗ്ലണ്ടിനെതിരെ ഹാർലീൻ ഡിയോൾ നേടിയ പ്രശസ്തമായ ക്യാച്ചിനെക്കുറിച്ച് പ്രധാനമന്ത്രി ഓർമ്മിച്ചു. അക്കാലത്ത് അദ്ദേഹം അതിനെക്കുറിച്ച് സോഷ്യൽ മീഡിയയിൽ പോസ്റ്റ് ചെയ്തിരുന്നു എന്നും കൂട്ടിച്ചേർത്തു.

ഫൈനൽ മത്സരശേഷം ക്യാപ്റ്റൻ ഹർമൻപ്രീത് കൗർ എങ്ങനെയാണ് പന്ത് പോക്കറ്റിൽ വെച്ചതെന്ന് പ്രധാനമന്ത്രി ആരാഞ്ഞു. പന്ത് തനിക്ക് ലഭിച്ചത് ഭാഗ്യമാണെന്നും അത് താൻ സൂക്ഷിച്ചുവെന്നും അവർ മറുപടി നൽകി.

രാജ്യമെമ്പാടുമുള്ള പെൺകുട്ടികൾക്ക് വേണ്ടി, പ്രത്യേകിച്ച് 'ഫിറ്റ് ഇന്ത്യ' എന്ന സന്ദേശം മുന്നോട്ട് കൊണ്ടുപോകാൻ പ്രധാനമന്ത്രി അവരോട് ആവശ്യപ്പെട്ടു. വർദ്ധിച്ചു വരുന്ന അമിതവണ്ണത്തെക്കുറിച്ച് അദ്ദേഹം സംസാരിക്കുകയും, ഫിറ്റ്നസ് നിലനിർത്തേണ്ടതിന്റെ പ്രാധാന്യം ഊന്നിപ്പറയുകയും ചെയ്തു. കൂടാതെ, സ്കൂളുകൾ സന്ദർശിച്ച് യുവമനസ്സുകൾക്ക് പ്രചോദനം നൽകണമെന്നും അദ്ദേഹം അവരോട് അഭ്യർഥിച്ചു.