Save the Date video | സേവ് ദി ഡേറ്റ് വീഡിയോക്കിടെ വെള്ളത്തിൽ മുങ്ങി യുവാവും യുവതിയും; വീഡിയോ വൈറൽ

ചില വീഡിയോകൾ ഇത്തരം വ്യത്യസ്തതയുടെ പേരിൽ വൈറലാവാറുണ്ട്. പലപ്പോഴും, വീഡിയോ എടുത്ത രീതി മാത്രമാവില്ല, ഷൂട്ടിനിടെ സംഭവിച്ച തമാശകളും അബദ്ധങ്ങളുമെല്ലാം ഈ രീതിയിൽ പ്രചരിക്കാറുണ്ട്. അത്തരമൊരു വീഡിയോ കുറച്ച്‌ ദിവസമായി സോഷ്യൽ മീഡിയയിൽ ശ്രദ്ധ നേടുകയാണ്. ഈ വീഡിയോ എവിടെ നിന്നുള്ളതാണെന്നോ, ആരാണ് വീഡിയോയിൽ ഉള്ളതെന്നോ എങ്ങും പരാമർശിച്ചിട്ടില്ല.

യുവതിയെ വെള്ളത്തിൽ നിന്നും എടുത്തുയർത്തുന്ന യുവാവാണ് വീഡിയോയിൽ. എന്നാൽ നിനച്ചിരിക്കാതെ കാര്യങ്ങൾ കൈവിട്ടു പോയത് വളരെ പെട്ടെന്നാണ്. നവവധുവിനെ എടുത്തുയർത്തുന്നതിനിടയിൽ വരന്റെ ബാലൻസ് തെറ്റുന്ന കാഴ്ചയാണ് പിന്നീട് കണ്ടത്. പെട്ടെന്ന് പുഴയിലേക്ക് മറിഞ്ഞ യുവാവും യുവതിയും ഭയചകിതരാവുന്നതും കാണാം.

ഇരുവർക്കും നീന്തൽ അത്ര വശമില്ല എന്ന് വീഡിയോയിൽ നിന്നും ഏറെക്കുറെ വ്യക്തം. വെള്ളത്തിലേക്ക് മറിഞ്ഞ യുവാവിനെ രക്ഷപെടുത്താൻ എന്തുചെയ്യണമെന്നറിയാതെ കുഴങ്ങുകയാണ് യുവതി.

വീഡിയോ ചിത്രീകരിക്കുന്നവരും, അതിനായി തയ്യാറാവുന്ന വധൂവരന്മാരും മുൻകരുതലുകൾ ഇല്ലാതെ ഇറങ്ങിത്തിരിക്കരുത് എന്ന് വീണ്ടും വീണ്ടും ആവർത്തിക്കുകയാണ് ഈ വീഡിയോ. രണ്ടുപേരും അപകടമൊന്നുമില്ലാതെ രക്ഷപെട്ടു എന്ന് വീഡിയോയിൽ സൂചനകളുണ്ട്. വീഡിയോ ചുവടെ കാണാം:

2020ൽ ഒരു പ്രീ-വെഡിങ് ഫോട്ടോഷൂട്ടിൽ വരനും വധുവും മരണപ്പെട്ടിരുന്നു. ദാരുണമായ അപകടത്തിൽ, കാവേരി നദിയിൽ കുട്ടവള്ളം മറിഞ്ഞ് ചന്ദ്രു (28), ശശികല (20) എന്നിവരാണ് മരിച്ചത്. നവംബർ 22നായിരുന്നു ഇവരുടെ വിവാഹം നിശ്ചയിച്ചിരുന്നത്. തലക്കാടിന് സമീപം ഇരുവരും ഫോട്ടോഷൂട്ടിന് വേണ്ടി നദിയിലേക്കിറങ്ങിയതിന് ശേഷമാണ് അപകടമുണ്ടായത്. ഹൈഹീൽ ചെരിപ്പ് ധരിച്ച ശശികലക്ക് അടി തെറ്റിയതോടെ വള്ളം നദിക്കരയിൽ നിന്ന് 30 മീറ്ററോളം നീങ്ങിയതായി റിപോർട്ടുകൾ പറഞ്ഞു. ഇതേത്തുടർന്ന് വള്ളം തകർന്ന് ഇരുവരും മുങ്ങിമരിക്കുകയായിരുന്നു. മൂന്ന് മണിക്കൂറിന് ശേഷം പ്രൊഫഷണൽ നീന്തൽ വിദഗ്ധരാണ് ഇവരുടെ മൃതദേഹം പുറത്തെടുത്തത്.