Covid | കൊല്ലത്ത് 45 പഞ്ചായത്തുകൾ അടച്ചു; കാസർകോട്ട് അഞ്ചിടത്ത് നിരോധനാജ്ഞ

കാസർകോട് ചെങ്കളയിൽ വിവാഹത്തിൽ പങ്കെടുത്ത 43 പേർക്ക് കോവിഡ് സ്ഥിരീകരിച്ചു. മാനദണ്ഡങ്ങൾ പാലിക്കാതെ വിവാഹച്ചടങ്ങ് സംഘടിപ്പിച്ചതിനു കേസെടുത്തു. വിവാഹ വീട് കേന്ദ്രീകരിച്ചു പുതിയ ക്ലസ്റ്റർ പ്രഖ്യാപിച്ചു. മംഗൽപാടി പഞ്ചായത്തിലും വിവാഹത്തിൽ പങ്കെടുത്തവർക്കു രോഗം കണ്ടെത്തി. ഈ ചടങ്ങുകളിൽ പങ്കെടുത്തവരോടു ക്വാറന്റീനിൽ പോകാൻ നിർദേശിച്ചു. ജില്ലയിൽ മഞ്ചേശ്വരം, കുമ്പള, കാസർകോട്, ഹൊസ്ദുർഗ്, നീലേശ്വരം പൊലീസ് സ്റ്റേഷൻ പരിധിയിൽ കലക്ടർ നിരോധനാജ്ഞ പ്രഖ്യാപിച്ചു. പൊതുഗതാഗതവും കൂടിച്ചേരലും അനാവശ്യ യാത്രകളും നിരോധിച്ചു. ഒന്നിടവിട്ട ദിവസങ്ങളിൽ രാവിലെ 11 മുതൽ 5 വരെ അവശ്യസാധനങ്ങൾ വിൽക്കുന്ന കടകൾ മാത്രമേ തുറക്കാൻ അനുമതിയുള്ളൂ.

കണ്ണൂർ ഗവ.മെഡിക്കൽ കോളജിലെ ശസ്ത്രക്രിയ വിഭാഗം, എംആർഐ, സിടി സ്കാൻ എന്നിവ താൽക്കാലികമായി അടച്ചു. കൂത്തുപറമ്പ്, പാനൂർ നഗരസഭകളിലും മാങ്ങാട്ടിടം, പാട്യം, കോട്ടയം പഞ്ചായത്തുകളിലും ഇന്ന് സമ്പൂർണ ലോക്ഡൗൺ.

മലപ്പുറം ജില്ലയിൽ പൊന്നാനി, നിലമ്പൂർ, കൊണ്ടോട്ടി നഗരസഭകളും 2 പഞ്ചായത്തുകളിൽ 5 വീതം വാർഡുകളും കണ്ടെയ്ൻമെന്റ് സോണിൽ തുടരുന്നു. കൊണ്ടോട്ടിയിൽ എംഎൽഎയും നഗരസഭാധ്യക്ഷയും സെക്രട്ടറിയും 35 കൗൺസിലർമാരും ആരോഗ്യപ്രവർത്തകരും ഉൾപ്പെടെ കോവിഡ് പ്രതിരോധത്തിനു നേതൃത്വം നൽകിയിരുന്ന 70 പേ‌ർ ക്വാറന്റീനിൽ.

തൃശൂർ ജില്ലയിൽ ഇരിങ്ങാലക്കുട നഗരസഭയും മുരിയാട് പഞ്ചായത്തും ട്രിപ്പിൾ ലോക്ഡൗണിൽ. ചാലക്കുടി ടൗൺ കണ്ടെയ്ൻമെന്റ് സോൺ. ഇരിങ്ങാലക്കുട ഫയർ സ്റ്റേഷനിൽ 15 പേർക്ക് രോഗം സ്ഥിരീകരിച്ചു. ഇരിങ്ങാലക്കുട പൊലീസ് സ്റ്റേഷനിൽ 21 പൊലീസുകാർ ക്വാറന്റീനിൽ. തൃശൂർ ഗവ. മെഡിക്കൽ കോളജിൽ 20 ഡോക്ടർമാരടക്കം 60 ആരോഗ്യ പ്രവർത്തകർ ക്വാറന്റീനിൽ.

പാലക്കാട് ജില്ലയിൽ പട്ടാമ്പി താലൂക്കിലും നെല്ലായ പഞ്ചായത്തിലും ലോക്ഡൗൺ തുടരുന്നു.

ഇടുക്കിയിൽ, കട്ടപ്പന മുനിസിപ്പാലിറ്റിയിലെയും വാത്തിക്കുടി പഞ്ചായത്തിലെയും 2 വീതം വാർഡുകളും കാമാക്ഷി പഞ്ചായത്തിലെ 3 വാർഡുകളും കണ്ടെയ്ൻമെന്റ് സോണായി പ്രഖ്യാപിച്ചു.