മലപ്പുറത്ത് പ്ലസ് വൺ വിദ്യാർഥിയുടെ ചവിട്ടേറ്റ അധ്യാപകന് വയറ്റിൽ നീർക്കെട്ട്; വീണ്ടും ആശുപത്രിയിൽ

മലപ്പുറം: കുറ്റിപ്പുറത്ത് പ്രിൻസിപ്പലിന്‍റെ സാന്നിദ്ധ്യത്തിൽ പ്ലസ്‌വണ്‍ വിദ്യാര്‍ഥിയുടെ ആക്രമണത്തിന് ഇരയായ അധ്യാപകൻ സജീഷിനെ വീണ്ടും ആശുപത്രിയിൽ പ്രവേശിപ്പിച്ചു. ചവിട്ടേറ്റ് വയറ്റിൽ നീർക്കെട്ടുണ്ടായതോടെയാണ് ഇദ്ദേഹത്തെ വളാഞ്ചേരിയിലെ സ്വകാര്യ ആശുപത്രിയിൽ പ്രവേശിപ്പിച്ചത്. വിദ്യാർഥി കൈപിടിച്ച് തിരിച്ചതിനെ തുടർന്ന് കൈക്കുഴ വേര്‍പ്പെട്ട കുറ്റിപ്പുറം പേരശനൂര്‍ ഗവ. ഹയര്‍ സെക്കൻഡറി സ്കൂളിലെ അധ്യാപകൻ കുണ്ടില്‍ചോലയില്‍ സജീഷിനെ (46) നേരത്തെ ആശുപത്രിയിൽ എത്തിച്ച് വിദഗ്ദ ചികിത്സ നൽകിയിരുന്നു. ശാരീരിക അസ്വസ്ഥതകളെ തുടർന്നാണ് വീണ്ടും ആശുപത്രിയിലാക്കിയത്.