മിഠായി മോഷ്ടിച്ചെന്ന് കടക്കാരന്റെ പരാതി; യുപിയിൽ 12 വയസ്സുകാരിയെ പിതാവ് തല്ലിക്കൊന്നു

കടയുടമ കുട്ടിക്കെതിരെ മോക്ഷണാരോപണം ഉന്നയിച്ചതാണ് കൊലപാതകത്തിന് കാരണമെന്ന് പോലീസ് പറയുന്നു. പെൺകുട്ടി കടയിൽ നിന്ന് മിഠായി പാക്കറ്റ് മോഷ്ടിച്ചെന്ന് കടക്കാരൻ പുഷ്പേന്ദ്രയോട് പരാതിപ്പെട്ടിരുന്നു. ഇതിൽ പ്രകോപിതനായ പുഷ്പേന്ദ്ര മകളെ വടികൊണ്ട് അതിക്രൂരമായി മർദ്ദിക്കുകയായിരുന്നു. മർദ്ദനമേറ്റ കുട്ടി സംഭവസ്ഥലത്ത് വെച്ച് തന്നെ മരിച്ചു.

കുട്ടിയുടെ അമ്മ ആരതി നൽകിയ പരാതിയുടെ അടിസ്ഥാനത്തിലാണ് പോലീസ് കേസെടുത്തത്. മാർച്ച് 27-നാണ് അമ്മ പരാതി നൽകിയത്. ഞായറാഴ്ച പുലർച്ചയോടെ പുഷ്പേന്ദ്രയെ പോലീസ് പിടികൂടി. കൊലപാതകത്തിന് ഉപയോഗിച്ച വടി പ്രതിയുടെ മൊഴിയുടെ അടിസ്ഥാനത്തിൽ കണ്ടെടുത്തതായി എസ്.എച്ച്.ഒ ഗംഗാ പ്രസാദ് ആര്യ അറിയിച്ചു.