Explained | സിറ്റി ബാങ്ക് അബദ്ധത്തില്‍ കൈമാറിയത് 6,554 കോടി രൂപയോളം‍; ബാങ്ക് ഇടപാടിൽ ശ്രദ്ധിക്കേണ്ട കാര്യങ്ങൾ എന്തൊക്കെ?

ഇങ്ങനെ ഒരു സംശയം എല്ലാവർക്കും ഉണ്ടാകും. ഇത്രയും ഭീമമായ തുക മറ്റൊരാൾക്ക് എങ്ങനെ അയയ്ക്കാൻ കഴിയും. സാധാരണ സാഹചര്യത്തിൽ ഇങ്ങനെയൊരു തെറ്റ് ഒരിക്കലും സംഭവിക്കാൻ പാടുള്ളതല്ല. പണമിടപാട് നടത്തുമ്പോൾ അത് അയയ്ക്കുന്നയാൾ അംഗീകരിക്കുകയും ഗുണഭോക്താവിന്റെ വിവരങ്ങൾ എല്ലാം കൃത്യമായി നൽകിയിരിക്കുന്നു എന്ന് ഉറപ്പ് വരുത്തുകയും ചെയ്യേണ്ടതുണ്ട്.

ഇങ്ങനെ സംഭവിക്കുന്ന സാഹചര്യങ്ങളിൽ, ബാങ്ക് ഉടൻ തന്നെ അവരുടെ എസ്ഒപി (സ്റ്റാൻഡാർഡ് ഓപ്പറേറ്റിംഗ് പ്രൊസീഡിയർ) ആരംഭിക്കുന്നു. പണം ലഭിച്ച സ്വീകർത്താവിനെ ഇത് അറിയിക്കുകയും തുടർന്ന് ഇടപാട് തിരിച്ചെടുക്കാനുള്ള അഭ്യർത്ഥനകൾ നടത്തുകയും ചെയ്യുന്നു. എന്നാൽ, പണം ലഭിച്ചയാൾ അത് തിരിച്ച് തരാൻ വിസമ്മതിക്കുകയാണെങ്കിൽ, തുടർന്ന് ചെയ്യേണ്ട കാര്യങ്ങളെക്കുറിച്ച് ബാങ്കിന് നിയമ നടപടികൾ തേടാവുന്നതാണ്. പൊലീസിന് പരാതി നൽകുന്നതും കോടതിയിൽ കേസ് സമർപ്പിക്കുന്നതുമൊക്കെ ഇതിൽ ഉൾപ്പെടുത്താം.

ഒരു ഉപഭോക്താവ് തെറ്റായ രീതിയിൽ ബെനഫിഷ്യറി നൽകുകയും തുടർന്ന് ആ അക്കൗണ്ടിലേക്ക് പണം അയയ്ക്കുകയും ചെയ്യുന്ന കേസുകളും നിരവധി ഉണ്ട്. ഇത്തരത്തിലുള്ള സാഹചര്യത്തിൽ, ബാങ്ക് അതിന്റെ ഉടമ നൽകുന്ന വിവരങ്ങൾ അതേ പടി പാലിച്ചിരിക്കുന്നതിനാൽ ഉത്തരവാദിത്തം മുഴുവൻ ഉപഭോക്താവിനാണ്. പണം തിരികെ ലഭിക്കണമെങ്കിൽ ഉപഭോക്താവ് ആ അക്കൗണ്ട് ഉടമയെ കോൺടാക്ട് ചെയ്യേണ്ടതുണ്ട്. പണം തിരികെ ലഭിക്കാത്ത അവസ്ഥ വരികയാണെങ്കിൽ നിയമ നടപടി തേടുകയാണ് ചെയ്യേണ്ടത്.

പണമടയ്ക്കുന്ന ഉപഭോക്താവ് തെറ്റായ വിവരങ്ങൾ നൽകുകയും നിങ്ങൾ ആ അക്കൗണ്ടിലേക്ക് പണം നിക്ഷേപിക്കുകയും ചെയ്താൽ, പണം അടയ്ക്കുന്ന ഉപഭോക്താവിന്റെ അഭ്യർത്ഥനയിൽ, പണം നൽകുന്ന ബാങ്ക് പണം ലഭിച്ചിരിക്കുന്ന ബാങ്കിലേക്ക് കാരണം ചോദിച്ച് പണം തിരിച്ച് നൽകുന്നതിനായുള്ള അഭ്യർത്ഥന അയച്ചേക്കാം.

ഇങ്ങനെയുള്ള സന്ദർഭത്തിൽ നിങ്ങൾ തീർച്ചയായും ആ പണം തിരികെ ഉടമയ്ക്ക് നൽകേണ്ടതാണ്. തങ്ങളുടേതല്ലാത്ത പണം അക്കൗണ്ടിലേക്ക് വരുമ്പോൾ, അത് തികച്ചും അറിവില്ലാത്ത ഒരു അക്കൗണ്ട് നമ്പറിൽ നിന്നുകൂടി ആകുമ്പോൾ അത് നിങ്ങളുടെ ബാങ്കിന്റെ ശ്രദ്ധയിൽപ്പെടുത്താൻ മറക്കരുത്.