കാൽവിരലുകൾ മുറിച്ചുമാറ്റി; മുപ്പത് ഓപ്പറേഷൻ; ‌‌‌ഒരു മാസം കോമയിൽ; ഒരു കൊതുകുകടിയ്ക്കു ശേഷം യുവാവിന് സംഭവിച്ചത്

ഏഷ്യൻ ടൈഗർ എന്ന വിഭാ​ഗത്തിൽ പെട്ട കൊതുകാണ് സെബാസ്റ്റ്യനെ കടിച്ചത്. ആശുപത്രിയിൽ പ്രവേശിച്ചപ്പോഴാണ് ഇയാളുടെ രക്തത്തിൽ വിഷബാധയുണ്ടായെന്ന് കണ്ടെത്തിയത്. കരൾ, വൃക്ക, ഹൃദയം, ശ്വാസകോശം എന്നിവയുടെ പ്രവർത്തനത്തെയും അതു ബാധിച്ചു. ‌അവിടം കൊണ്ടും ദുരിതങ്ങൾ അവസാനിച്ചില്ല. സെബാസ്റ്റ്യന്റെ ഇടതു തുടയിൽ ഒരു വലിയ കുരു വന്നു. ‘സെറാറ്റിയ മാർസെസെൻസ്’ എന്ന ബാക്ടീരിയയാണ് അതിനു കാരണമെന്ന് ‍ഡോക്ടർമാർ കണ്ടെത്തി. അതിജീവിക്കാനുള്ള സാധ്യത വളരെ കുറവാണെന്നാണ് കരുതിയിരുന്നത്. അതോടെ ആ ചെറുപ്പക്കാരന്റെ എല്ലാ പ്രതീക്ഷകളും അസ്തമിച്ചു. എന്നാൽ മുപ്പത് ഓപ്പറേഷനുകൾക്കും രണ്ട് കാൽവിരലുകൾ ഭാഗികമായി മുറിച്ചു മാറ്റിയതിനും ശേഷം, അവസ്ഥ മെച്ചപ്പെട്ടെന്നും ഇതുവരെ മറ്റു കുഴപ്പങ്ങളൊന്നും ഇല്ലെന്നും സെബാസ്റ്റ്യൻ പറയുന്നു.

ഈഡിസ് ആൽബോപിക്റ്റസ് എന്ന ശാസ്ത്രീയ നാമത്തിലാണ് ഏഷ്യൻ ടൈഗർ കൊതുകുകൾ അറിയപ്പെടുന്നത്. കറുപ്പിൽ വെളുത്ത വരകൾ ഉള്ളവയാണ് ഇത്തരം കൊതുകുകൾ. നാഷണൽ ഹെൽത്ത് ലൈബ്രറിയുടെ കണക്കനുസരിച്ച്, ഏറ്റവും വേഗത്തിൽ വ്യാപിക്കുന്ന കൊതുകുകളിൽ ഒന്നാണിത്. മറ്റ് കൊതുകുകളെപ്പോലെ, മരങ്ങളിലും പഴയ ടയറുകളിലും വെള്ളം നിറഞ്ഞ ചാലുകളും ചതുപ്പുനിലങ്ങളിലുമൊക്കെയാണ് ഏഷ്യൻ ​ടൈ​ഗർ കൊതുകുകൾ മുട്ടയിടുന്നത്. മുട്ടയിട്ടുകഴിഞ്ഞാൽ, ഇവ തങ്ങളുടെ പ്രജനനസ്ഥലത്തു നിന്ന് അര മൈലിൽ കൂടുതൽ പറക്കില്ല.

ഡെങ്കിപ്പനി, ചിക്കുൻഗുനിയ, മഞ്ഞപ്പനി, വെസ്റ്റ് നൈൽ പനി, എൻസെഫലൈറ്റിസ്, സിക്ക വൈറസ് തുടങ്ങിയ ഇരുപതിലധികം തരം വൈറസുകൾ പരത്താനുള്ള ശേഷി ഏഷ്യൻ ​ടൈ​ഗർ വിഭാ​ഗത്തിൽ പെട്ട കൊതുകുകൾക്കുണ്ട്. ഇൻഫ്ലുവൻസ പോലുള്ള അണുബാധ, പനി, കൈകാലുകളിലെ വേദന, ക്ഷീണം എന്നിവയ്ക്കും ഇവ കാരണമാകും. ടൈഗർ കൊതുകുകൾ കടിച്ചാൽ സാധാരണ കൊതുകൾ കടിക്കുന്നതു പോലെയേ തോന്നൂ, പക്ഷേ അതിന്റെ പ്രത്യാഘാതങ്ങൾ വലുതാണ്. സെബാസ്റ്റ്യന്റെ കാര്യത്തിൽ സംഭവിച്ചതു പോലെ അവ വളരെക്കാലം നീണ്ടുനിൽക്കുകയും ദോഷകരമായി ബാധിക്കുകയും ചെയ്തേക്കാം.