പാക് വ്യോമസേന പരിശീലനകേന്ദ്രം ആക്രമിച്ച ഭീകരസംഘടന; തെഹ്‌രീക്-ഇ-ജിഹാദ് പാകിസ്ഥാൻ ലക്ഷ്യമിടുന്നത് എന്ത്?

ഈ വർഷം ഫെബ്രുവരിയിലാണ് തെഹ്‌രീക്-ഇ-ജിഹാദ് പാകിസ്ഥാൻ എന്ന തീവ്രവാദ സംഘടന രൂപീകരിക്കപ്പെട്ടത്. സംഘടനയുടെ രൂപീകരണത്തിന് തൊട്ടുപിന്നാലെ, ഈ ഗ്രൂപ്പുമായി ബന്ധപ്പെട്ടു പ്രവർത്തിക്കുന്ന ഒരാൾ ബലൂചിസ്ഥാനിൽ ആക്രമണം നടത്തി. ആക്രമണത്തിൽ ഒരു സൈനികൻ കൊല്ലപ്പെടുകയും മറ്റൊരാൾക്ക് പരിക്കേൽക്കുകയും ചെയ്തു. ബലൂചിസ്ഥാൻ, ഖൈബർ പഖ്തൂൺഖ്വ പ്രവിശ്യകളിലാണ് ഈ സംഘം പ്രധാനമായും സജീവായി പ്രവർത്തിക്കുന്നതെന്നാണ് കരുതപ്പെടുന്നത്.

അഫ്ഗാനിസ്ഥാനിൽ താലിബാൻ നടപ്പിലാക്കിയതിനു സമാനമായി, പാക്കിസ്ഥാനെ ഒരു ഇസ്ലാമിക രാഷ്ട്രമാക്കി മാറ്റുന്നതിനും ശരിയത്ത് നിയമം നടപ്പിലാക്കാനുമാണ് തെഹ്‌രീക്-ഇ-ജിഹാദ് ശ്രമിക്കുന്നത്. പാകിസ്ഥാനെതിരെ ‘വിശുദ്ധ യുദ്ധം’ അല്ലെങ്കിൽ ജിഹാദ് നടത്തുക എന്ന ഉദ്ദേശ്യത്തോടെയാണ് ഈ സംഘടന സ്ഥാപിക്കപ്പെട്ടത്.

ഇക്കഴിഞ്ഞ മാർച്ചിൽ ബലൂചിസ്ഥാനിലെ ക്വറ്റയിൽ തെഹ്‌രീക്-ഇ-ജിഹാദിൽ പെട്ട ഒരു ചാവേർ, തന്റെ ബൈക്ക് സൈന്യത്തിന്റെ സുരക്ഷാ വാഹനത്തിലേക്ക് ഇടിച്ചുകയറ്റിയിരുന്നു. ആക്രമണത്തിൽ ഒമ്പത് സുരക്ഷാ ഉദ്യോഗസ്ഥർ കൊല്ലപ്പെടുകയും 13 പേർക്ക് പരിക്കേൽക്കുകയും ചെയ്തിരുന്നു. ഈ വർഷം മെയ് മാസം, ബലൂചിസ്ഥാനിൽ ടിജെപി നടത്തിയ ആക്രമണത്തിൽ ആറ് തീവ്രവാദികളും ഏഴ് സൈനികരും കൊല്ലപ്പെട്ടിരുന്നു. ജൂലൈ 12 ന്, ബലൂചിസ്ഥാനിൽ പട്ടാളത്തിന് നേരെയുണ്ടായ ഭീകരാക്രമണത്തിന് സുരക്ഷാ സേന തിരിച്ചടിച്ചതിനെ തുടർന്ന് ഒമ്പത് പാകിസ്ഥാൻ സൈനികരും അഞ്ച് തീവ്രവാദികളും കൊല്ലപ്പെട്ടു. ഈ ആക്രമണത്തിന്റെ ഉത്തരവാദിത്തവും തെഹ്‌രീക്-ഇ-ജിഹാദ് ഏറ്റെടുത്തിരുന്നു.