മൊബൈല്‍ ഫോണ്‍ തലച്ചോറില്‍ കാന്‍സറുണ്ടാക്കുമോ? ലോകാരോഗ്യ സംഘടന പഠനത്തില്‍ പറയുന്നത്

''മൊബൈല്‍ ഫോണ്‍ ഉപയോഗവും മസ്തിഷ്‌ക കാന്‍സറും തലയിലും കഴുത്തിലുമായി കാണപ്പെടുന്ന കാന്‍സറുകളും തമ്മില്‍ ബന്ധമുണ്ടെന്ന് പഠനത്തില്‍ കണ്ടെത്താന്‍ കഴിഞ്ഞിട്ടില്ല. മൊബൈല്‍ ഫോണ്‍ ഉപയോഗം കുതിച്ചുയരുന്നുണ്ടെങ്കിലും ബ്രെയിന്‍ ട്യൂമര്‍ ബാധിക്കുന്നവരുടെ എണ്ണം സ്ഥിരമായ നിരക്കില്‍ തന്നെ തുടരുകയാണ്,'' പഠനത്തില്‍ പങ്കെടുത്ത ഗവേഷകനായ കെന്‍ കരിപ്പിഡിസ് പറഞ്ഞു. ഓസ്‌ട്രേലിയന്‍ റേഡിയേഷന്‍ പ്രൊട്ടക്ഷന്‍ ആന്‍ഡ് ന്യൂക്ലിയര്‍ സേഫ്റ്റി ഏജന്‍സിയുടെ( അര്‍പാന്‍സ) നേതൃത്വത്തില്‍ നടത്തിയ ചിട്ടയായ അവലോകനത്തില്‍ ഈ വിഷയത്തെക്കുറിച്ചുള്ള 5000ല്‍ പരം പഠനങ്ങളാണ് പരിശോധിച്ചത്.

റേഡിയോ ഫ്രീക്വന്‍സി തരംഗങ്ങള്‍ വഴിയാണ് മൊബൈല്‍ഫോണ്‍ സിഗ്നലുകള്‍ കൈമാറുന്നത്. ഇത് വൈദ്യുതകാന്തിക സ്‌പെക്ട്രത്തിലെ ഊര്‍ജത്തിന്റെ ഒരു രൂപമാണ്. അതിനാലാണ് മൊബൈല്‍ഫോണുകള്‍ ഇലക്ട്രോമാഗ്നറ്റിക് റേഡിയേഷന്‍ പുറപ്പെടുവിക്കുന്നതെന്ന് പറയപ്പെടുന്നു.

2011ല്‍ റേഡിയോ ഫ്രീക്വന്‍സിയും ഇലക്ട്രോമാഗ്നറ്റിക് ഫീല്‍ഡുകളും കാന്‍സറിന് സാധ്യതയുണ്ടാക്കുന്നുണ്ടോയെന്നറിയാന്‍ ലോകാരോഗ്യസംഘടനയുടെ ഇന്റര്‍നാഷണല്‍ ഏജന്‍സി ഫോര്‍ റിസേര്‍ച്ച് ഓണ്‍ കാന്‍സറിനെ (ഐഎആര്‍സി) നിയോഗിച്ചിരുന്നു. മൊബൈല്‍ ഫോണ്‍ ഉപയോഗവും അര്‍ബുദവും തമ്മില്‍ ബന്ധമൊന്നുമില്ലെന്ന് മാത്രമല്ല മൊബൈല്‍ ഫോണിന്റെ ദീര്‍ഘകാല ഉപയോഗവും (10 വര്‍ഷവും അതില്‍ കൂടുതലോ ഉപയോഗിക്കുന്നത്) ആവൃത്തിയും (വിളിച്ച കോളുകളുടെ എണ്ണം അല്ലെങ്കില്‍ ഓരോ കോളിനും ചെലവഴിച്ച സമയം) തമ്മിലും ബന്ധമൊന്നുമില്ലെന്നും കണ്ടെത്തി. ഈ റിപ്പോര്‍ട്ട് തയ്യാറാക്കാന്‍ 5000ല്‍ പരം പഠനങ്ങളാണ് വിശകലനം ചെയ്തത്.

''സെല്‍ഫോണുകളില്‍ നിന്നുള്ള റേഡിയേഷന്‍ അയൊണൈസിംഗ് അല്ലാത്തവയാണ്, അതായത് കാന്‍സറിന് കാരണമാകാത്തത്. അതേസമയം, ഒരു എക്സ് റേ മെഷീനില്‍ നിന്നുള്ള വികിരണം അയോണൊസിംഗ് ആണ്. ഇത് കാന്‍സര്‍ ഉണ്ടാക്കുന്നതാണ്. കെമിക്കല്‍ ബോണ്ടുകള്‍ തകര്‍ക്കാനും ആണവ നിലയങ്ങളിലെ പോലെ ആറ്റങ്ങളില്‍ നിന്ന് ഇലക്ട്രോണുകള്‍ നീക്കം ചെയ്യാനും ജൈവ പദാര്‍ഥങ്ങളിലെ കോശങ്ങളെ നശിപ്പിക്കാനും എക്‌സ് റേ പോലെയുള്ള അയോണൈസിംഗ് റേഡിയേഷന് മതിയായ ഊര്‍ജമുണ്ട്'', ഈ രംഗത്തെ വിദഗ്ധനായ ഡോ. ശങ്കറിനെ ഉദ്ധരിച്ച് ഇന്ത്യന്‍ എക്‌സ്പ്രസ് റിപ്പോര്‍ട്ടു ചെയ്തു.