Avihitham | 'അവിഹിതത്തിൽ' പിള്ളേച്ചനും പുരുഷുവും വീണ്ടും; സരസുവും തിരിച്ചുവരുമോ?

മലയാള സിനിമയിൽ പ്രേക്ഷകർ കുടുകുടെ ചിരിച്ച ഒരവിഹിതം ഉണ്ടെങ്കിൽ, അത് പിള്ളേച്ചന്റെയും സരസുവിന്റെയുമായിരിക്കും. ദിലീപ് നായകനായ 'മീശ മാധവൻ' ചിത്രത്തിൽ, ഏറെ ശ്രദ്ധനേടിയ കഥാപാത്രങ്ങളാണ് ജഗതി ശ്രീകുമാർ അവതരിപ്പിച്ച ഭഗീരഥൻ പിള്ള എന്ന പിള്ളേച്ചനും ഗായത്രി വർഷയുടെ സരസുവും. പട്ടാളത്തിൽ ജോലിയുള്ള പുരുഷുവിന്റെ ഭാര്യയായ സരസുവിന്റെ വിവാഹേതരബന്ധം നാട്ടിലെ കാശുകാരനായ പിള്ളേച്ചനുമായാണ്. ഇവരുടെ രഹസ്യ സമാഗമമാണ് സിനിമയിൽ പരാമർശിക്കപ്പെട്ട രംഗം. ഇപ്പോൾ 'അവിഹിതം' (Avihitham) എന്ന പേരിൽ ഒരു സിനിമ ഒരുങ്ങുമ്പോൾ, പുരുഷുവും പിള്ളേച്ചനും കൂടിയുള്ള 'പുരുഷു എന്നെ അനുഗ്രഹിക്കണം' എന്ന ഡയലോഗ് അവരും കടമെടുത്തിരിക്കുന്നു. സിനിമയുടെ ഭാഗമായി പുറത്തുവന്ന റീൽസ് വീഡിയോയിൽ ഇത് കേൾക്കാം. അവിഹിതം ft. പിള്ളേച്ചൻ എന്ന പേരിലാണ് വീഡിയോ വന്നുചേർന്നിട്ടുള്ളത്.