ഒടുവിലൊരു ചിരി ! വീണ്ടും ഞെട്ടിക്കാന്‍ മമ്മൂട്ടി; ഭ്രമയുഗം ടീസര്‍

മലയാളത്തിന്‍റെ മഹാനടന്‍ മമ്മൂട്ടിയെ നായകനാക്കി ഭൂതകാലം ഫെയിം രാഹുൽ സദാശിവൻ തിരക്കഥയെഴുതി സംവിധാനം ചെയ്യുന്ന 'ഭ്രമയുഗം'ത്തിന്റെ ടീസർ പുറത്തിറങ്ങി. ബ്ലാക്ക് ആൻഡ് വൈറ്റ് നിറത്തിൽ, "കാലം പോലെ കലങ്ങി മറിഞ്ഞൊരു പുഴ വേറെയില്ല, അത് തിരിഞ്ഞും മറിഞ്ഞും ഒഴുകും" എന്ന വിവരണത്തോടെ ആരംഭിക്കുന്ന ടീസർ പഴക്കം ചെന്ന ഒരു മനയുടെ പശ്ചാത്തലത്തില്‍ ചിരിച്ചുകൊണ്ട് നിൽക്കുന്ന മമ്മൂട്ടിയുടെ കഥാപാത്രത്തെ അവതരിപ്പിച്ചുകൊണ്ടാണ് അവസാനിക്കുന്നത്. നിഗൂഢമായ നിരവധി സംഭവങ്ങള്‍ നിറഞ്ഞ സിനിമയാണ് 'ഭ്രമയുഗം' എന്ന് തെളിയിക്കുന്ന ടീസറിൽ ഭയത്താൽ കണ്ണുകൾ കലങ്ങിയ അർജുൻ അശോകന്റെ കഥാപാത്രത്തെയും കാണാം.