ദുബായിലെ പുതുവത്സര രാവില്‍ ഷെയ്ഖ് സായീദ് റോഡും മറ്റ് പ്രധാന പാതകളും അടച്ചിടും; സമയക്രമം അറിയാം

പുതുവത്സര രാവില്‍ ഷെയ്ഖ് സയീദ് റോഡും മറ്റ് പ്രധാന പാതകളും അടച്ചിടുമെന്ന് ദുബായിലെ റോഡ്‌സ് ആന്‍ഡ് ട്രാന്‍സ്‌പോര്‍ട്ട് അതോറിറ്റി(ആര്‍ടിഎ) ചൊവ്വാഴ്ച അറിയിച്ചു. ഡിസംബര്‍ 31ന് വൈകീട്ട് നാല് മുതലാണ് റോഡുകൾഅടച്ച് തുടങ്ങുക. ദുബായിലേക്കും പുതുവത്സരാഘോഷം നടക്കുന്ന മറ്റ് പ്രധാന ഇടങ്ങളിലേക്കും പോകുന്ന താമസക്കാരും സഞ്ചാരികളും തങ്ങളുടെ യാത്രകള്‍ നേരത്തെ ആരംഭിക്കണമെന്നും യാത്രക്കായി പൊതുഗതാഗതം പ്രയോജനപ്പെടുത്തണമെന്നും ആര്‍ടിഎ ട്രാഫിക് എക്‌സിക്യുട്ടിവ് ഡയറക്ടര്‍ ഹുസൈന്‍ അല്‍ ബാന പറഞ്ഞു. ഈ സ്ഥലങ്ങളിലെ ആഘോഷങ്ങളില്‍ പങ്കെടുക്കാന്‍ ആഗ്രഹമില്ലാത്തവര്‍ അവിടെ നിന്ന് നേരത്തെ പോകണമെന്നും ഇവിടേക്ക് എത്തിച്ചേരാന്‍ ആഗ്രഹിക്കുന്നവര്‍ വൈകുന്നേരം നാല് മണിക്ക് മുമ്പായി എത്തിച്ചേരണമെന്നും അദ്ദേഹം അദ്ദേഹം അറിയിച്ചു.