Afghanistan Taliban | ഇന്ത്യക്കാരെ തിരിച്ചുകൊണ്ടുവരാൻ വ്യോമസേന വിമാനം കാബൂളിൽ; കുടുങ്ങി കിടക്കുന്നത് അഞ്ഞൂറോളം പേർ

ഐ‌എ‌എഫിന്റെ സി -17 ഗ്ലോബ്‌മാസ്റ്റർ മിലിട്ടറി ട്രാൻസ്പോർട്ട് വിമാനമാണ് ഒഴിപ്പിക്കൽ ദൗത്യങ്ങൾക്കായി എത്തിയത്. മറ്റൊരു വിമാനം ഉത്തർപ്രദേശിലെ ഗാസിയാബാദിലെ ഹിൻഡൺ വ്യോമസേന സ്റ്റേഷനിൽ നിന്ന് ഉടൻ അഫ്ഗാനിലേക്ക് തിരിക്കുമെന്നാണ് റിപ്പോർട്ട്. നയതന്ത്രജ്ഞ ഉദ്യോഗസ്ഥർ ഉൾപ്പെടെ കുറഞ്ഞത് 200 ഉദ്യോഗസ്ഥർ ഇന്ത്യയിലേക്ക് മടങ്ങാൻ കാത്തിരിക്കുന്നു എന്നാണ് സർക്കാർ ഉദ്യോഗസ്ഥരെ ഉദ്ധരിച്ച് ഹിന്ദുസ്ഥാൻ ടൈംസ് റിപ്പോർട്ട് ചെയ്തത്. "എംബസി കോമ്പൗണ്ടിൽ നിന്ന് എയർപോർട്ടിലേക്ക് ജീവനക്കാരെ കൊണ്ടുപോകുന്നതും ഒരു വെല്ലുവിളിയാണ്," ഉദ്യോഗസ്ഥർ പറയുന്നു.

കാബൂൾ എയർപോർട്ടിൽ വിമാന സർവീസുകൾക്കും അഫ്ഗാനിലേക്കുള്ള വ്യോമപാതയിലും വിലക്ക് ഏർപ്പെടുത്തിയതിനെ തുടർന്ന് എയർ ഇന്ത്യ ഡൽഹി-കാബൂൾ-ഡൽഹി വിമാനം റദ്ദാക്കിയിരുന്നു. ഇതേ തുടർന്നാണ് വ്യോമസേന വിമാനം കാബൂളിലേക്ക് അയച്ചത്.

കൂടാതെ, തിങ്കളാഴ്ച അമേരിക്കയിൽ നിന്ന് ഡൽഹിയിലേക്ക് വരുന്ന രണ്ട് വിമാനങ്ങൾ ഇതേ കാരണത്താൽ യുഎഇയിലെ ഷാർജയിലേക്ക് തിരിച്ചുവിട്ടു. എയർലൈൻസിന്റെ സാൻ ഫ്രാൻസിസ്കോ-ഡൽഹി ഫ്ലൈറ്റും ചിക്കാഗോ-ഡൽഹി ഫ്ലൈറ്റുമാണ് തിങ്കളാഴ്ച ഷാർജയിലേക്ക് തിരിച്ചുവിട്ടു. അഫ്ഗാനിസ്ഥാൻ വ്യോമ അതിർത്തി ഒഴിവാക്കുന്നതിന് വേണ്ടിയാണിത്.

Also Read- ഇനി 'ഇസ്ലാമിക് എമിറേറ്റ്‍സ് ഓഫ് അഫ്‍ഗാനിസ്ഥാന്‍'; പേരുമാറ്റി താലിബാൻ

അഫ്ഗാൻ തലസ്ഥാനം താലിബാൻ പിടിച്ചെടുക്കുകയും യുദ്ധം അവസാനിച്ചുവെന്നും സമാധാനം നിലനിൽക്കുകയും ചെയ്തുവെന്ന് പ്രഖ്യാപിച്ചതിന് തൊട്ടുപിന്നാലെ കാബൂൾ വിമാനത്താവളത്തിൽ നടന്ന തിക്കിലും തിരക്കിലും അഞ്ച് പേർ കൊല്ലപ്പെട്ടതായി റിപ്പോർട്ടുണ്ട്. അതേസമയം കാബൂൾ വിമാനത്താവളത്തിൽ വെടിവെപ്പിലാണ് അഞ്ചു പേർ കൊല്ലപ്പെട്ടതെന്നും സ്ഥിരീകരിക്കാത്ത റിപ്പോർട്ടുകളുണ്ട്. കാബൂളിൽ സ്ഥിതി വഷളായതോടെ ഇന്ത്യയും അമേരിക്കയും മറ്റ് പല രാജ്യങ്ങളുടെയും എംബസികളും അഫ്ഗാൻ നഗരത്തിൽ നിന്ന് തങ്ങളുടെ ജീവനക്കാരെ ഒഴിപ്പിക്കാൻ തുടങ്ങി. കഴിഞ്ഞ കുറച്ച് ദിവസങ്ങളായി, കാബൂൾ, കാണ്ഡഹാർ, ഹെറാത്ത്, മസാർ-ഇ-ഷെരീഫ്, ജലാലാബാദ് തുടങ്ങിയ നഗരങ്ങൾ ഉൾപ്പെടെ 34 പ്രവിശ്യാ തലസ്ഥാനങ്ങളിൽ 25-ന്റെ നിയന്ത്രണം പിടിച്ചെടുത്ത് താലിബാൻ ഭീകരർ അഫ്ഗാനിസ്ഥാനിലെ ഭൂരിഭാഗം പ്രദേശങ്ങളും പിടിച്ചടക്കി.