വാചകമടിയല്ല സ്ത്രീശാക്തീകരണം! 40.5 ശതമാനം സീറ്റുകൾ വനിതകൾക്ക് നൽകി മമത

അഞ്ച് സിറ്റിങ് എം.പിമാർ വിവിധ കാരണങ്ങളാൽ ഇത്തവണ മത്സരിക്കില്ലെന്ന് മമത ബാനർജി അറിയിച്ചു. ചലച്ചിത്ര താരങ്ങളായ നുസ്രത് ജഹാനും മിമി ചക്രബർത്തിയും തൃണമൂൽ സ്ഥാനാർത്ഥികളായി മത്സരിക്കും. നടനും സിറ്റിങ് എംപിയുമായ ദീപക് അധികാരി ഇത്തവണയും ഘറ്റൽ സീറ്റിൽ മത്സരിക്കുന്നുണ്ട്. മുതിർന്ന് നടൻ മൂൻ മൂൻ സെന്നും തൃണമൂൽ സ്ഥാനാർത്ഥി പട്ടികയിൽ ഉണ്ട്. ബിജിപിയുടെ സിറ്റിങ് എം.പി ബബുൽ സുപ്രിയയ്ക്കെതിരെയാണ് സെൻ മത്സരിക്കുന്നത്. നേരത്തെ മൂൻ മൂൻ സെൻ മത്സരിച്ച ബാങ്കുറയിൽ ഇത്തവണ തൃണമൂൽ കോൺഗ്രസ് മുതിർന്ന നേതാവ് സുബ്രത മുഖർജിയാണ് സ്ഥാനാർഥി.

സ്ഥാനാർഥി പ്രഖ്യാപനത്തിനായി വിളിച്ചുചേർത്ത പത്രസമ്മേളനത്തിൽ മോദി സർക്കാരിനെതിരെ രൂക്ഷ വിമർശനമാണ് മമത ഉന്നയിച്ചത്. വോട്ടർമാർക്ക് നൽകാൻ പണവുമായി ചില വിവിഐപികൾ ചാർട്ടർ ചെയ്ത വിമാനങ്ങളിലും ഹെലികോപ്റ്ററുകളിലും സഞ്ചരിക്കുന്നതായി തനിക്ക് വിവരം ലഭിച്ചിട്ടുണ്ടെന്ന് അവർ പറഞ്ഞു. ബംഗാളിന് പുറമെ ഒഡീഷ, ആസം, ജാർഖണ്ഡ്, ബീഹാർ, ആൻഡമാൻ എന്നിവിടങ്ങളിലെ ചില സീറ്റുകളിലും തൃണമൂൽ മത്സരിക്കുമെന്ന് മമത പറഞ്ഞു.