'നോട്ട് നിരോധനം നിയമവിരുദ്ധം'; ജസ്റ്റിസ് നാഗരത്‌ന സുപ്രീം കോടതിയുടെ ഭൂരിപക്ഷ വിധിയോട് വിയോജിച്ച 10 പോയിന്റ്

കേന്ദ്രസർക്കാർ നടപ്പിലാക്കിയ നോട്ടുനിരോധനം നിയമവിരുദ്ധമെന്ന് സുപ്രീംകോടതി ജസ്റ്റിസ് ബി വി നാഗരത്‌ന. ജസ്റ്റിസ് എസ് എ നസീർ അദ്ധ്യക്ഷനായ അഞ്ചംഗ ബെഞ്ചിലെ നാല് ജഡ്ജിമാർ നോട്ടുനിരോധനത്തെ അനുകൂലിച്ചപ്പോൾ ഒരാൾ മാത്രമാണ് വിയോജിപ്പ് പ്രകടിപ്പിച്ചത്. നോട്ടുനിരോധനത്തെ ചോദ്യം ചെയ്തുകൊണ്ടുള്ള ഹർജികളിലാണ് സുപ്രീംകോടതി വിധി പ്രഖ്യാപിച്ചത്. 2016 നവംബർ 8 നാണ് 500 ന്റെയും, 1000 ന്റെയും നോട്ടുകൾ റദ്ദാക്കിക്കൊണ്ട് കേന്ദ്രസർക്കാർ വിജ്ഞാപനം പുറപ്പെടുവിച്ചത്.

തീവ്രവാദ ഫണ്ടിംഗ്, കള്ളപ്പണം തുടങ്ങിയവയെ ചെറുക്കുക എന്ന   ഉദ്ദേശ്യത്തോടെയാണ് നോട്ടുനിരോധനം നടപ്പിലാക്കിയതെങ്കിലും കേന്ദ്രത്തിന് ഒരു നിയമനിർമാണത്തിലൂടെയോ ഓർഡിനൻസിലൂടെയോ നടപ്പിലാക്കാമായിരുന്നുവെന്നും ഈ വിഷയത്തിൽ ആർബിഐ സ്വതന്ത്ര മനസോടെ ആയിരിക്കില്ല സമ്മതം നൽകിയിട്ടുണ്ടാകുകയെന്നും ജസ്റ്റിസ് നാഗരത്‌ന വിധിന്യായത്തിൽ പറഞ്ഞു.

Also Read-നോട്ടുനിരോധനം സുപ്രീം കോടതി ശരിവെച്ചു; ‘കേന്ദ്ര നടപടിയില്‍ തെറ്റുണ്ടെന്ന് പറയാനാവില്ല’

ജസ്റ്റിസ് നാഗരത്‌നയുടെ വിധിപ്രസ്താവത്തിലെ പ്രധാനപ്പെട്ട 10 പോയിന്റുകൾ

1. നോട്ടുനിരോധനം കൊണ്ടുവരാൻ കേന്ദ്രസർക്കാർ ആലോചപ്പോൾ തന്നെ അത് ഓർഡിനൻസു വഴിയാണ് നടപ്പിലാക്കേണ്ടതെന്ന് എന്നും ആർബിഐയുടെ 26(2) വകുപ്പിന് കീഴിലല്ലെന്നും കേന്ദ്രം ഓർക്കേണ്ടതായിരുന്നു. രഹസ്യസ്വഭാവമുള്ള തീരുമാനങ്ങൾ നടപ്പിലാക്കണണെങ്കിൽ അത് കൊണ്ടുവരാനുള്ള വഴി ഓർഡിനൻസാണ്.
2. നോട്ടുകൾ അസാധുവാക്കാൻ കേന്ദ്ര സർക്കാരിന് അധികാരമുണ്ട്, എന്നാൽ അത് നിയമനിർമാണത്തിലൂടെയോ ഓർഡിനൻസ് വഴിയോ ആണ് ചെയ്യേണ്ടത്.
3. ഇത്തരം ഗൗരവമേറിയ തീരുമാനങ്ങൾ പാർലമെന്റ് അം​ഗങ്ങളെ അറിയിക്കേണ്ടതാണ്.
4. 24 മണിക്കൂറിനുള്ളിൽ വിജ്ഞാപനം പാസായതിനാൽ ആർബിഐക്ക് അത് പഠിക്കാനുള്ള സമയം ലഭിച്ചില്ല.
5. നോട്ട് അസാധുവാക്കൽ നടപടികൾ ആരംഭിക്കാനുള്ള നിർദേശം കേന്ദ്രം പെട്ടെന്ന് മുന്നോട്ടു വെച്ചപ്പോൾ ‌ആർബിഐക്ക് മറ്റൊന്നും പറയാനായില്ല.
6. 2016 നവംബർ 8-ലെ വിജ്ഞാപനം വഴി കേന്ദ്രസർക്കാർ നോട്ട് നിരോധനിച്ചത് നിയമപരമായി തെറ്റാണ്.
7. രാജ്യത്ത് പ്രചാരത്തിലുള്ള കറൻസിയുടെ 86 ശതമാനവും അസാധുവാക്കിയതായി ഹർജിക്കാർ പറയുന്നു. അതിന്റെ സാമൂഹിക-സാമ്പത്തിക പ്രത്യാഘാതങ്ങളെക്കുറിച്ച് ആർബിഐ ചിന്തിച്ചിട്ടുണ്ടോ എന്ന് ഞാൻ സംശയിക്കുന്നു.
8. 2016 നവംബർ 8ലെ വിജ്ഞാപനം നിയമവിരുദ്ധമാണ്. അതേ തുടർന്നുള്ള 2016ലെ ഓർഡിനൻസും 2017ലെ നിയമനിർമാണവും നിയമവിരുദ്ധമാണ്.
9. തീവ്രവാദ ഫണ്ടിംഗ്, കള്ളപ്പണം തുടങ്ങിയ സാമൂഹ്യ തിൻമകൾ ഇല്ലാതാക്കുക എന്ന ഉദ്ദേശ്യത്തോടെയാണ് നോട്ടുനിരോധനം നടപ്പിലാക്കിയത്. അത്തരം കാര്യങ്ങൾ ഇല്ലാതാക്കുക എന്നത് നല്ല കാര്യം തന്നെയാണ്
10. വസ്തുക്കളുടെ അടിസ്ഥാനത്തിലല്ല, മറിച്ച് നിയമത്തിന്റെ കണ്ണിലൂടെ നോക്കുമ്പോൾ നോട്ടു നിരോധിച്ച കേന്ദ്രസർക്കാരിന്റെ നടപടി നിയമവിരുദ്ധമാണ്.

നോട്ടുനിരോധനത്തോട് വിയോജിച്ചു കൊണ്ടുള്ള ഈ വിധി ബഹുമാനപ്പെട്ട സുപ്രീം കോടതിയുടെ ചരിത്രത്തിൽ രേഖപ്പെടുത്തിയിട്ടുള്ള പ്രസിദ്ധമായ വിയോജിപ്പു വിധികളുടെ കൂട്ടത്തിൽ സ്ഥാനം പിടിക്കുമെന്ന് ഹർജിക്കാർക്കു വേണ്ടി ഹാജരായ മുതിർന്ന അഭിഭാഷകനും കോൺഗ്രസ് നേതാവുമായ പി ചിദംബരം ട്വീറ്റ് ചെയ്തു. ”നോട്ട് നിരോധനത്തിലെ നിയമവിരുദ്ധതയും ക്രമക്കേടുകളും ഈ ന്യൂനപക്ഷ വിധിയിലൂടെ ചൂണ്ടിക്കാണിച്ചതിൽ ഞങ്ങൾക്ക് സന്തോഷമുണ്ട്. ഇത് സർക്കാരിന്റെ മുഖത്തേറ്റ അടിയാണ്” അദ്ദേഹം കൂട്ടിച്ചേർത്തു.