സുധീരനെ തളർത്താൻ കൂടോത്രം? വീടിന് ചുറ്റും ചെമ്പ് തകിടുകൾ; ഒമ്പതാം തവണയെന്ന് സുധീരൻ

തിരുവനന്തപുരം: മുതിർന്ന കോൺഗ്രസ് നേതാവ് വി എം സുധീരനെതിരെ കൂടോത്ര പ്രയോഗം. ഫേസ്ബുക്കിലൂടെ ചിത്രങ്ങൾ സഹിതം സുധീരൻ തന്നെയാണ് ഇക്കാര്യം വ്യക്തമാക്കിയത്. കണ്ണ്, കൈകൾ, കാലുകൾ, ആൾരൂപം, ശൂലങ്ങൾ, ഏതോ ലിഖിതമുള്ള ചെമ്പ് തകിടുകൾ, വെള്ളക്കല്ലുകൾ എന്നിവ ഒരു കുപ്പിയിൽ അടക്കം ചെയ്ത നിലയിലാണ് കണ്ടെടുത്തതെന്ന് ഫേസ്ബുക്ക് പോസ്റ്റിലൂടെ സുധീരൻ പറയുന്നു. ഇത് ഒമ്പതാം തവണയാണ് തന്റെ വീട്ടുപുരയിടത്തിൽനിന്ന് ഇത്തരം വസ്തുക്കൾ ലഭിക്കുന്നതെന്നും സുധീരൻ പറഞ്ഞു. തുടർച്ചയായി വരുന്നതുകൊണ്ടാണ് ഇത്തവണ എല്ലാവരെയും അറിയിച്ചത്. കുപ്പിയിൽനിന്ന് ലഭിച്ച വസ്തുക്കൾ മെഡിക്കൽ കോളേജ് പൊലീസിൽ ഏൽപ്പിച്ചതായും സുധീരൻ പറഞ്ഞു.