ആലപ്പുഴ വഴിയുള്ള വന്ദേഭാരതിന് കോച്ചുകൾ ഇരട്ടിയാക്കി; 530 സീറ്റ്‌ കൂടി വർധിക്കും

ബുധനാഴ്ച ഒഴികെ ആറ് ദിവസമാണ് സർവീസ് നടത്തുന്നത്. യാത്രക്കാരുടെ തിരക്കുണ്ടെങ്കിലും കോച്ചുകൾ കുറവായതിനാൽ ടിക്കറ്റ് കിട്ടാത്ത സ്ഥിതിയാണിപ്പോൾ.

രാവിലെ 6.25ന് മംഗളൂരുവിൽ നിന്ന് പുറപ്പെടുന്ന വന്ദേഭാരത് ഉച്ചയ്ക്കു 3.05ന് തിരുവനന്തപുരത്ത് എത്തും. തിരികെ വൈകിട്ട് 4.05ന് പുറപ്പെട്ട് പുലർച്ചെ 12.40ന് മംഗളൂരുവിൽ എത്തുന്ന രീതിയിലാണു സർവീസ്. നാഗർകോവിൽ – ചെന്നൈ വന്ദേഭാരതിന് 20 കോച്ചുകളുള്ള ട്രെയിൻ ഈ ആഴ്ച ലഭിക്കുമ്പോൾ അവിടെ നിന്നു പിൻവലിക്കുന്ന 16 കോച്ച് ട്രെയിനാണു പാലക്കാട് ഡിവിഷനു ലഭിക്കുക.

കോട്ടയം വഴിയുള്ള തിരുവനന്തപുരം – കാസർകോട് റൂട്ടിലെ വന്ദേഭാരതിന്റെ കോച്ചുകൾ അടുത്തിടെ 20 ആക്കിയിരുന്നു. മംഗളൂരു വന്ദേഭാരതും 20 കോച്ചുകളാക്കണമെന്നാണ് ആവശ്യം. 16 കോച്ചുകൾ ഉപയോഗിച്ചുള്ള സർവീസ് ലാഭകരമാണെങ്കിൽ 20 കോച്ചുകളുള്ള ട്രെയിൻ പിന്നീട് മംഗളൂരു റൂട്ടിൽ അനുവദിക്കും.