നാലു വയസുകാരനെയും കൊണ്ട് അച്ഛൻ ബസിനു മുന്നിൽ ചാടി ജീവനൊടുക്കാൻ ശ്രമം; രക്ഷകനായി ‍ഡ്രൈവർ

പത്തനംതിട്ട: നാലു വയസ്സുള്ള കുഞ്ഞിനെയും കൊണ്ട് അച്ഛൻ സ്വകാര്യ ബസിനു മുൻപിലേക്കു ചാടി ജീവനൊടുക്കാൻ ശ്രമിച്ചു. ഡ്രൈവർ മനഃസാന്നിധ്യം കൈവിടാതെ പെട്ടെന്നു ബ്രേക്കിട്ട് നിർത്തിയതിനാൽ ഇരുവരും പരുക്കൊന്നുമില്ലാതെ രക്ഷപ്പെട്ടു. തിങ്കൾ രാവിലെ 9.30ന് അടൂർ പാർഥസാരഥി ജംക്‌ഷനു സമീപത്തു വച്ചാണ് ആദിക്കാട്ടുകുളങ്ങര സ്വദേശിയായ 45 കാരൻ മകനെയും കൊണ്ടു സ്വകാര്യ ബസിനു മുൻപിലേക്കു ചാടിയത്. ഭാര്യയെ ഡോക്ടറെ കാണിക്കാൻ വേണ്ടിയാണു ഇയാൾ രാവിലെ അടൂർ ജനറൽ ആശുപത്രിയിൽ എത്തിയത്. മാസ്ക് വാങ്ങാൻ ആശുപത്രിക്കു പുറത്തുള്ള കടയിലേക്കു പോയ ഭാര്യയെ അവിടെ നോക്കിയെങ്കിലും കാണാത്തതിലുള്ള വിഷമത്തിൽ ബസിനു മുൻപിൽ ചാടിയെന്നാണ് ഇയാള്‍ പൊലീസിനോട് പറ‌ഞ്ഞത്.