'ഗാന്ധിയും നെഹ്റുവും യുകെയിൽ പോയല്ലേ പഠിച്ചത്?' വിദേശ ചികിത്സാ വിവാദത്തിൽ എം.എ ബേബി

ചികിത്സയ്ക്കായി മന്ത്രിമാർ വിദേശത്തു പോകുന്നതിൽ പ്രതികരണവുമായി സിപിഎം ജനറൽ സെക്രട്ടറി എംഎ ബേബി. ഗാന്ധിയും ജവഹർലാൽ നെഹ്റുവും യുകെയിൽ പോയല്ലേ പഠിച്ചതെന്നും ചിലകാര്യങ്ങളെ പർവതീകരിച്ച് ആശയക്കുഴപ്പമുണ്ടാക്കുന്നതിൽ അർത്ഥമില്ലെന്നും മാധ്യമപ്രവർത്തകരുടെ ചോദ്യങ്ങൾക്ക് മറുപടിയായി എംഎ ബേബി പറഞ്ഞു. കേരളത്തിലെ ആരോഗ്യ മേഖല മറ്റെല്ലാ സംസ്ഥാനങ്ങളെക്കാളും മുന്നിട്ടുനിൽക്കുന്നുണ്ടെങ്കിലും ചില പ്രശ്നങ്ങൾ ഇപ്പോഴും നിലനിൽക്കുന്നുണ്ടെന്നും അത് പരിഹരിക്കാനാണ് ഇടതുപക്ഷ സർക്കാർ ശ്രമിക്കുന്നതെന്നും എംഎ ബേബി പറഞ്ഞു. കാര്യങ്ങൾ ചർച്ചചെയ്ത് പരിഹരിക്കാമെന്നും മന്ത്രി രാജി വയ്ക്കേണ്ട കാര്യമില്ലെന്നും അദ്ദേഹം കൂട്ടിച്ചേർത്തു.