ആർദ്ര കേരളം പുരസ്ക്കാരം: ആരോഗ്യ രംഗത്തെ മികവിന് അംഗീകാരം കരസ്ഥമാക്കി എറണാകുളം ജില്ലാ പഞ്ചായത്ത്

ആരോഗ്യ മേഖലയിൽ നടത്തിയ മികവുറ്റ പ്രവർത്തനങ്ങൾക്കുള്ള ആർദ്ര കേരളം പുരസ്ക്കാരത്തിൽ ഒന്നാം സ്ഥാനം കരസ്ഥമാക്കി എറണാകുളം ജില്ലാ പഞ്ചായത്ത്. തിരുവനന്തപുരം ടാഗോർ തീയറ്ററിൽ നടന്ന ചടങ്ങിൽ 10 ലക്ഷം രൂപയും പ്രശസ്തിഫലകവുമടങ്ങിയ പുരസ്‌കാരം മന്ത്രി വീണാ ജോർജിൽ നിന്ന് ജില്ലാ പഞ്ചായത്ത് പ്രസിഡൻ്റ് മനോജ് മൂത്തേടൻ ഏറ്റുവാങ്ങി. സംസ്ഥാന ആരോഗ്യ വകുപ്പ് ഏർപ്പെടുത്തിയ പ്രഥമ ആയുഷ് കായകൽപ്പ അവാർഡിൽ ആയുർവേദ വിഭാഗത്തിൽ ജില്ലാ പഞ്ചായത്തിന് കീഴിലുളള ജില്ലാ ആയുർവേദ ആശുപത്രി ഒന്നാം സ്ഥാനവും ഹോമിയോ വിഭാഗത്തിൽ ജില്ലാ ഹോമിയോ ആശുപത്രി രണ്ടാം സ്ഥാനവും അലോപ്പതി വിഭാഗത്തിൽ ആലുവ ജില്ലാ ആശുപത്രി കമൻഡേഷൻ അവാർഡും നേടി. ജില്ലാ പഞ്ചായത്തിൻ്റെ കീഴിലുള്ള ആലുവ ജില്ലാ ആശുപത്രി, കച്ചേരിപ്പടി ജില്ലാ ആയുർവേദ ആശുപത്രി, പുല്ലേപ്പടി ജില്ലാ ഹോമിയോ ആശുപത്രി എന്നീ സ്ഥാപനങ്ങളുടെ അടിസ്ഥാന സൗകര്യങ്ങൾ വികസിപ്പിക്കാനും, രോഗി സൗഹൃദമാക്കാനും, മാലിന്യ സംസ്കരണം ഉറപ്പുവരുത്താനും കഴിഞ്ഞു.