മരട് 24-ാം ഡിവിഷനിൽ സൗജന്യ മൾട്ടി ജിം; പൊതുജനങ്ങൾക്ക് ആധുനിക ഫിറ്റ്‌നസ് സൗകര്യം

മരട് നഗരസഭ 24-ാം ഡിവിഷനിൽ സൗജന്യ മൾട്ടി ജിം പ്രവർത്തനമാരംഭിച്ചു. ഡിവിഷൻ ഫണ്ട് വിനിയോഗിച്ച് നിർമ്മിച്ച ജിം നഗരസഭ ചെയർപേഴ്സൺ ആൻ്റണി ആശാം പറമ്പിൽ ഉദ്ഘാടനം ചെയ്തു. ആരോഗ്യബോധം വളർത്തുക എന്നത് നഗരസഭയുടെ ലക്ഷ്യങ്ങളിലൊന്നാണ്, ആധുനിക സംവിധാനങ്ങളോടെ ഒരുക്കിയിരിക്കുന്ന ജിം പൊതുജനങ്ങൾക്ക് ആരോഗ്യ പരിപാലനത്തിന് സഹായകരമാകുമെന്ന് ചെയർപേഴ്സൺ പറഞ്ഞു. 1500 രൂപ മുതൽ സ്വകാര്യ മൾട്ടി ജിമുകൾ വരിസംഖ്യയായി വാങ്ങുന്ന അവസരത്തിലാണ് നഗരസഭ സൗജന്യമായി സേവനങ്ങൾ ലഭ്യമാക്കുന്നത്.