കാർഷിക പൈതൃകത്തിൻ്റെ നേർക്കാഴ്ചയായ കളമശ്ശേരി കാർഷികോത്സവം വർണാഭമായ ഓണാഘോഷങ്ങളോടെ കൊടിയിറങ്ങി

ഏഴ് ദിവസം നീണ്ടുനിന്ന കാർഷികോത്സവത്തിൻ്റെ മൂന്നാം പതിപ്പ് നാടിൻ്റെ കാർഷിക പൈതൃകത്തിൻ്റെ നേർക്കാഴ്ചയായി. സമാപന ചടങ്ങിൽ വ്യവസായ വകുപ്പ് മന്ത്രി പി. രാജീവ് മാവേലിയെ വേദിയിലേക്ക് ആനയിച്ച് ആഘോഷങ്ങൾക്ക് തുടക്കം കുറിച്ചു. തുടർന്ന് വിവിധതരം മത്സരങ്ങൾ അരങ്ങേറി. നാടൻ വിഭവങ്ങൾ നിരന്ന പാചകമത്സരവും, വടംവലി മത്സരവും ആഘോഷ പരിപാടികൾക്ക് മാറ്റുകൂട്ടി. ഏറ്റവും മികച്ച പ്രദർശന സ്റ്റാളുകൾക്ക് സമാപന ചടങ്ങിൽ മന്ത്രി പി. രാജീവ് സർട്ടിഫിക്കറ്റുകൾ വിതരണം ചെയ്തു. വലിയ ജനപങ്കാളിത്തമാണ് മൂന്നാമത് കളമശ്ശേരി കാർഷികോത്സവത്തിന് ലഭിച്ചത്.