മാവേലിക്കസ് 2025ന് കോഴിക്കോട് പ്രൗഢഗംഭീര സമാപനം
Last Updated:
ജില്ലയിലെ വിവിധ ഭാഗങ്ങളിലെ ഒമ്പത് വേദികളിലായി കേരളത്തിനകത്തും പുറത്തും നിന്നുള്ള 50ഓളം കലാകാരന്മാർ വിവിധ പരിപാടികൾ അവതരിപ്പിച്ചു.
കോഴിക്കോടിന് പുത്തൻ കാഴ്ചകളുടെ പൊന്നോണം സമ്മാനിച്ച സർക്കാരിൻ്റെ ഓണം വാരാഘോഷം 'മാവേലിക്കസ് 2025'ന് പ്രൗഢഗംഭീര സമാപനം. സമാപന സമ്മേളനം ലുലു മാളിലെ വേദിയിൽ മന്ത്രി പി എ മുഹമ്മദ് റിയാസ് ഉദ്ഘാടനം ചെയ്തു. കോഴിക്കോട്ടെ ജനത ഓണപ്പരിപാടികൾ ഇരു കൈയും നീട്ടിയാണ് കോഴിക്കോട്ടുകാർ സ്വീകരിചതെന്ന് മന്ത്രി പറഞ്ഞു. അടുത്ത വർഷവും അതിഗംഭീരമായി ഓണാഘോഷം നടത്തും. അടുത്ത വർഷത്തെ ഓണസമ്മാനമായി കോഴിക്കോടിനെ കനാൽ സിറ്റിയാക്കുന്ന പദ്ധതിയുടെ പ്രവൃത്തി ആരംഭിക്കും. ബേപ്പൂർ അന്താരാഷ്ട്ര വാട്ടർ ഫെസ്റ്റ് സീസൺ നാലിൻ്റെ മാധ്യമ പുരസ്കാരങ്ങളും മന്ത്രി വിതരണം ചെയ്തു.
സംസ്ഥാന വിനോദസഞ്ചാര വകുപ്പിൻ്റെയും ജില്ലാ ടൂറിസം പ്രമോഷൻ കൗൺസിലിൻ്റെയും നൃത്ത പരിപാടികളും, നാടകോത്സവവും, നാടൻ കലാകാരൻമാരുടെ വിവിധ കലാപ്രകടനങ്ങളും കേരള ആർട്‌സ് ആൻഡ് ക്രാഫ്റ്റ് വില്ലേജിൻ്റെ നേതൃത്വത്തിൽ സെപ്റ്റംബർ ഒന്നുമുതൽ ഏഴുവരെയാണ് ഓണം വാരാഘോഷത്തിൻ്റെ ഭാഗമായി കോഴിക്കോട് നടന്നത്. സിനിമ, സംഗീത മേഖലയിലെ പ്രഗത്ഭരുടെ നേതൃത്വത്തിലുള്ള പരിപാടികളും നഗരത്തെ ആവേശപ്പൂരത്തിലാക്കിയാണ് ഓണാഘോഷം കൊടിയിറങ്ങിയത്.
ജില്ലയിലെ വിവിധ ഭാഗങ്ങളിലെ ഒമ്പത് വേദികളിലായി (കോഴിക്കോട് ബീച്ച്, ലുലു മാൾ, ഭട്ട് റോഡ് ബീച്ച്, തളി, കുറ്റിച്ചിറ, മാനാഞ്ചിറ, ടൗൺ ഹാൾ, ബേപ്പൂർ, സർഗാലയ ക്രാഫ്റ്റ് വില്ലേജ്) കേരളത്തിനകത്തും പുറത്തും നിന്നുള്ള 50ഓളം കലാകാരന്മാർ വിവിധ പരിപാടികൾ അവതരിപ്പിച്ചു. നാടകോത്സവം, ഫുഡ് ഫെസ്റ്റിവൽ, പുസ്തകമേള, ഫ്ലവർ ഷോ, ട്രേഡ് ഫെയർ തുടങ്ങിയവയും നടന്നു. ഉദ്ഘാടന ചടങ്ങിനുശേഷം വേദിയിൽ പിന്നണി ഗായിക ചിന്മയി ശ്രീപദ നയിച്ച സംഗീത പരിപാടിയും അരങ്ങേറികൊണ്ട് മാവേലിക്കസ് 2025ന് പ്രൗഢഗംഭീര സമാപനമായി.
ഏറ്റവും പുതിയ വാർത്തകൾ, വിഡിയോകൾ, വിദഗ്ദാഭിപ്രായങ്ങൾ, രാഷ്ട്രീയം, ക്രൈം, തുടങ്ങി എല്ലാം ഇവിടെയുണ്ട്. ഏറ്റവും പുതിയ കേരളവാർത്തകൾക്കായി News18 മലയാളത്തിനൊപ്പം വരൂ
Location :
Kozhikode [Calicut],Kozhikode,Kerala
First Published :
September 09, 2025 12:50 PM IST
