'മാങ്കൂട്ടവുമായി വേദി പങ്കിടരുതെന്നത് പാർട്ടി നിലപാട്; പാലക്കാട് മുനിസിപ്പൽ ചെയർപേഴ്സനെ തള്ളി ബിജെപി ജില്ലാ നേതൃത്വം

പാലക്കാട്: ആരോപണവിധേയനായ രാഹുൽ മാങ്കൂട്ടത്തിൽ എംഎൽഎയ്ക്കൊപ്പം നഗരസഭാ ചെയർപേഴ്‌സണും ബിജെപി നേതാവുമായ പ്രമീള ശശിധരൻ വേദി പങ്കിട്ടത് സംബന്ധിച്ച് പാലക്കാട് ബിജെപിയിൽ ഭിന്നത. എംഎൽഎ രാജിവെക്കും വരെ ബിജെപി പ്രതിഷേധം തുടരുമെന്നും, രാഹുലുമായി ഒരാളും വേദി പങ്കിടരുതെന്നതാണ് പാർട്ടി നിലപാട് എന്നും ബിജെപി ജില്ലാ പ്രസിഡന്റ് പ്രശാന്ത് ശിവൻ വ്യക്തമാക്കി. പ്രമീള ശശിധരൻ പരിപാടിയിൽ പങ്കെടുക്കരുതായിരുന്നുവെന്നും അവർ അരുതാത്തത് ചെയ്തുവെന്നും പ്രശാന്ത് ശിവൻ ആരോപിച്ചു. വിഷയത്തിൽ സംസ്ഥാന നേതൃത്വം ഇടപെടുന്നുണ്ടെന്നും പാർട്ടി വേദികളിൽ വിഷയം അവതരിപ്പിച്ചിട്ടുണ്ടെന്നും അദ്ദേഹം അറിയിച്ചു.