'പാലിക്കാനാകാത്ത വാഗ്ദാനങ്ങൾ നൽകാറില്ല': വയോധികന്റെ ഭവനസഹായ അപേക്ഷ നിരസിച്ചുവെന്ന  വാർ‌ത്തകളോട് പ്രതികരിച്ച് സുരേഷ് ഗോപി

തൃശൂർ: ഭവന സഹായത്തിനായുള്ള വയോധികന്‌റെ നിവേദനം വാങ്ങാൻ‌ തയാറായില്ലെന്ന വാർത്തകളോട് പ്രതികരിച്ച് കേന്ദ്രമന്ത്രി സുരേഷ് ഗോപി. സംഭവത്തെ ചിലർ സ്വന്തം രാഷ്ട്രീയ അജണ്ടകൾക്കായി ഉപയോഗിക്കുന്നുവെന്ന് സുരേഷ് ഗോപി ഫേസ്ബുക്ക് കുറിപ്പില്‍ വ്യക്തമാക്കി. ഒരു പൊതുപ്രവർത്തകനെന്ന നിലയിൽ എന്ത് ചെയ്യാനാകും, എന്ത് ചെയ്യാൻ കഴിയില്ല എന്നതിനെ കുറിച്ച് എപ്പോഴും വ്യക്തമായ ധാരണയുണ്ടെന്നും പാലിക്കാനാകാത്ത വാഗ്ദാനങ്ങൾ‌ നൽകാറില്ലെന്നും ജനങ്ങൾ‌ക്ക് വ്യാജ പ്രതീക്ഷ നൽകുന്നത് തന്റെ ശൈലിയല്ലെന്നും സുരേഷ് ഗോപി പറയുന്നു. ഭവനനിർമ്മാണം ഒരു സംസ്ഥാന വിഷയമാണെന്നും സുരേഷ് ഗോപി ചൂണ്ടിക്കാട്ടുന്നു. പുള്ളിലെ കൊച്ചുവേലായുധൻ എന്ന വയോധികനാണ് ഭവനസഹായത്തിനായി നിവേദനവുമായി സുരേഷ് ഗോപിക്ക് നിവേദനം നൽകാൻ ശ്രമിച്ചത്. വയോധികന് വീട് നിർമിച്ച് നൽകുമെന്ന് സിപിഎം കഴിഞ്ഞ ദിവസം പ്രഖ്യാപിച്ചിരുന്നു.